AQSh Iranmen baılanysy bar Sırııadaǵy nysandarǵa soqqy berdi

NUR-SULTAN. QazAqparat – AQSh áskerı kúshteri seısenbide Sırııanyń Deır-ez-Zor provıntsııasynda Irannyń Islam revolıýtsııalyq saqshylar korpýsymen (IRSK) baılanysty toptar paıdalanatyn nysandarǵa áýe shabýyldaryn jasaǵanyn málim etti, dep habarlaıdy QazAqparat Reuters agenttigine silteme jasap.

Sársenbidegi AQSh Qarýly kúshteri ortalyq qolbasshylyǵynyń (USCENTCOM) málimdemesine sáıkes, shabýyl prezıdent Djo Baıdenniń buıryǵymen jasalǵan jáne AQSh kúshterin Iran qoldaǵan toptardyń shabýylynan qorǵaýǵa baǵyttalǵan.

«Búgin Prezıdent Baıdenniń buıryǵymen AQSh qarýly kúshteri Sırııadaǵy Deır-ez-Zor provıntsııasyna áýe shabýyldary jasaldy. Bul naqty soqqylar amerıkalyq áskerlerdi qorǵaýǵa arnalǵan», - delingen habarlamada.

Málimdeme 15 tamyzda bolǵan oqıǵaǵa silteme jasalǵan. Ol kezde Sırııadaǵy halyqaralyq koalıtsııa kúshteriniń aýmaǵyna jáne AQSh qoldaǵan Sırııa oppozıtsııasynyń jaýyngerlerine pılotsyz ushyrylatyn qarýmen shabýyl jasalǵan bolatyn.

«Qurama Shtattar shıelenis izdemeıdi, biraq halqymyzdy qorǵaý úshin qajetti sharalar qoldanýdy jalǵastyrady. AQSh kúshteri DAISh sodyrlaryn jeńý úshin Sırııada qalady», - dedi USCENTCOM qoǵammen baılanys dırektory polkovnık Djo Býchchıno.

Foto: AP