AQSh Iranǵa shabýyl jasaý josparyn ýaqytsha toqtatty
ASTANA. KAZINFORM — AQSh prezıdenti Donald Tramp Tegeranmen kelisimge kelý múmkindigin berý úshin Iranǵa jasalatyn jańa shabýyldardy keıinge qaldyrý týraly sheshim qabyldaǵanyn málimdedi. Bul týraly ol Truth Social áleýmettik jelisindegi paraqshasynda jazdy, dep habarlaıdy Kazinform agenttigi BBC-ge silteme jasap.
Donald Tramptyń aıtýynsha, AQSh Iranǵa «Ekinshi dúnıejúzilik soǵystan keıin bolmaǵan áskerı qýatty qoldana otyryp» soqqy berýge daıyn bolǵan.
Alaıda amerıkalyq kóshbasshynyń sózinshe, Iran jáne Taıaý Shyǵystaǵy birqatar el Vashıngtonnan shabýyldy toqtatýdy suraǵan. Sebebi taraptar yqtımal kelisimniń negizgi parametrleri boıynsha ortaq mámilege kelgen.
— Men bul sheshimdi búkil álemniń tynyshtyǵy, sondaı-aq tabysty ári órkendegen Irannyń bolashaǵy úshin qabyldadym. Kelisim qysqa merzimde jasalsa, shabýyldy toqtatýǵa kelistim, — dep jazdy Tramp.
Ol sondaı-aq Izraıldiń dıplomatııalyq jolmen retteý bastamasyn qoldaıtynyn aıtty.
Tramptyń bul málimdemesi Taıaý Shyǵystaǵy shıelenis áli de saqtalyp otyrǵan kezde jasaldy. Iran tóńiregindegi jaǵdaı álemdik munaı naryǵyna jáne óńirdegi teńiz tasymaly qaýipsizdigine áserin tıgizip otyr.
Eske salaıyq, buǵan deıin Donald Tramptyń málimdemelerinen keıin Brent munaıy shamamen 7% qymbattaǵanyn habarlaǵan edik.
