AQSh Iranǵa onynshy kún qatarynan soqqy jasap jatyr
ASTANA. KAZINFORM – AQSh Qarýly kúshteri Iranǵa qarsy aýqymdy áskerı operatsııasyn onynshy kún qatarynan jalǵastyryp jatyr. AQSh Ortalyq qolbasshylyǵy (CENTCOM) Iranǵa qarsy jańa soqqylar legi bastalǵanyn málimdedi, dep habarlaıdy DW.
CENTCOM taratqan aqparatqa sáıkes, shabýyldar 20 shilde kúni Soltústik Amerıkanyń shyǵys jaǵalaýy ýaqytymen saǵat 16:00-de (Ortalyq Eýropa ýaqytymen 22:00) bastalǵan. Bul joly naqty qandaı nysandarǵa soqqy jasalǵany aıtylmady.
Today at 4 p.m. ET, U.S. forces began a new round of strikes against Iran at the Commander in Chief's direction. The strikes are designed to further degrade Iranian military capabilities used to attack commercial shipping in the Strait of Hormuz.
— U.S. Central Command (@CENTCOM) July 20, 2026
AQSh áskeri málimdemesinde bul operatsııalardyń maqsaty – Irannyń Ormýz buǵazyndaǵy azamattyq keme qatynasyna shabýyl jasaý úshin paıdalanylatyn áskerı áleýetin odan ári álsiretý ekeni kórsetilgen.
AQSh sarbazdarynyń qazasyna berilgen jaýap – Tramp
21 shildege qaraǵan túni jasalǵan jańa shabýyldardyń aldynda AQSh prezıdenti Donald Tramp Iranǵa amerıkalyq áskerı qyzmetkerlerdiń jańa shyǵyndary úshin «birneshe ese jaýap beretinin» eskertti.
– Iran árbir amerıkalyq sarbazdy óltirgen saıyn, oǵan birneshe ese aýyr jaýap qaıtarylady, – dep jazdy Aq úı basshysy Truth Social áleýmettik jelisinde.
Ol bul jónindegi tapsyrma qorǵanys mınıstri Pıt Hegsetke jetkizilgenin atap ótti.
Buǵan deıin fýtboldan álem chempıonatynyń fınalynan keıin Vashıngtonǵa qaıtyp kele jatqanda Tramp jańa shabýyldardy AQSh áskerı qyzmetkerleriniń qazasyna jaýap dep ataǵan.
– Búgin túnde biz olarǵa óte aýyr soqqy jasadyq. Muny qaza tapqan sarbazdardyń qurmetine arnadyq, – dedi AQSh prezıdenti.
Taıaý Shyǵystaǵy jańa shıelenis bastalǵaly beri CENTCOM úsh amerıkalyq áskerı qyzmetkerdiń qaza tapqanyn habarlady. Osylaısha, aqpan aıynyń sońynda Iranmen soǵys bastalǵaly beri qaza tapqan AQSh áskerı qyzmetkerleriniń sany 17-ge jetti.
Ormýz buǵazyndaǵy qozǵalys baıaýlady
Iran Islam revolıýtsııasy saqshylar korpýsy (KSIR) 20 shildege qaraǵan túni Ormýz buǵazy mańynda buǵazǵa zańsyz kirýge nemese odan ońtústik baǵyt arqyly shyǵýǵa árekettengen eki munaı tankerin ustaǵanyn málimdedi.
Irannyń Tasnim memlekettik aqparat agenttiginiń habarlaýynsha, tankerler jarylǵan.
AQSh pen Iran arasyndaǵy áskerı teketirestiń kúsheıýine baılanysty ótken demalys kúnderi Ormýz buǵazy arqyly ótetin keme qozǵalysy taǵy da azaıdy. London qor bırjasynyń málimetine sáıkes, 19 shildede buǵazdan tórt keme, al 18 shildede segiz keme ótken.
Aıta keteıik, keshe AQSh Irannyń Hormozgan provıntsııasyndaǵy Hadjıabad qalasyna soqqy jasady.
