AQSh Iranǵa qarsy jańa soqqylar serııasyn bastady
ASTANA. KAZINFORM – AQSh sársenbi kúni keshke Iranǵa qarsy jańa soqqylar serııasyn bastap, onyń Ormýz buǵazynda qaýip tóndirý múmkindigin shekteýge kiristi, dep habarlaıdy Reuters.
AQSh Ortalyq qolbasshylyǵy áskerı kúshter Irannyń Úlken Týnb aralyndaǵy jaǵalaýdaǵy qorǵanys júıelerine, sondaı-aq qanatty zymyrandardy saqtaý oryndary men ushyrý alańdaryna shamamen tańǵy saǵat 6-da (GMT boıynsha saǵat 10:00) shabýyl jasap, shamamen 90 mınýt ishinde birqatar shabýyldardy aıaqtaǵanyn habarlady.
Bul týraly AQSh Qarýly kúshteriniń Ortalyq qolbasshylyǵy (CENTCOM) X áleýmettik jelisinde málimdedi.
Toǵyz saǵattan keıin CENTCOM Iranǵa qarsy ekinshi soqqylar tolqyny bastalǵanyn habarlady.
– Bul soqqylar álemdik saýda úshin strategııalyq mańyzy bar halyqaralyq sý joly – Ormýz buǵazy arqyly erkin qatynaıtyn kemelerge qaýip tóndirýge paıdalanylyp otyrǵan Irannyń áskerı áleýetine baǵyttalǵan. AQSh áskeri Joǵarǵy bas qolbasshynyń tapsyrmasy boıynsha Irandy jaýapkershilikke tartyp jatyr, – delingen CENTCOM-nyń X áleýmettik jelisindegi málimdemesinde.
Reuters agenttigine pikir bildirgen amerıkalyq úsh sheneýniktiń aıtýynsha, Ormýz buǵazyn qaıta ashýǵa baǵyttalǵan AQSh-tyń áskerı operatsııasy Irannyń áskerı nysandaryn joıýdy da kózdeıdi. Vashıngton kúrdelirek operatsııalarǵa kirispes buryn osy nysandardy zalalsyzdandyrýdy josparlap otyr.
Buǵan deıin Irannyń Islam revolıýtsııasy saqshylar korpýsy (KSIR) AQSh «basqynshylyq áreketterin» toqtatpaıynsha Ormýz buǵazy jabyq kúıinde qalatynyn málimdep, munaı men gaz eksporttalatyn ózge de óńirlik baǵyttardy jabýy múmkin ekenin eskertken.
Aıta keteıik, osyǵan deıin AQSh prezıdenti Donald Tramp Tegeran kelissózderge qaıta oralmaǵan jaǵdaıda Irannyń kópirleri men elektr stantsııalaryna soqqy jasalýy múmkin ekenin taǵy da málimdegen edi.
