AQSh Iranǵa qarsy «sheshýshi soqqy» jasaýdy qarastyryp jatyr — Axios
ASTANA. KAZINFORM – Vashıngton Tegeranmen kelissóz sátsiz aıaqtalǵan jaǵdaıda shıelenisti kúsheıtý máselesin pysyqtap jatyr. Bul týraly Kazinform agenttiginiń menshikti tilshisi habarlaıdy.
Amerıka Qurama Shtattary Iranǵa qarsy «sheshýshi soqqy» berýdiń birneshe nusqasyn ázirlep jatyr. Bul stsenarııler qurlyq áskerin qoldanýdy jáne aýqymdy áýe naýqanyn qamtýy múmkin.
Bul jóninde Axios basylymy amerıkandyq sheneýnikter men talqylaýlarǵa qatysqan derekkózderge silteme jasap habarlady.
Basylym málimetinshe, mundaı sharalar Iranmen joǵary deńgeıdegi kelissózderdi bastaý áreketteri nátıje bermegen jaǵdaıda jáne Iran Ormýz buǵazy arqyly keme qatynasyna qaýip tóndirýin jalǵastyrǵan jaǵdaıda qarastyrylyp otyr. Vashıngton mundaı qadam AQSh-tyń kelissózderdegi pozıtsııasyn kúsheıtýi múmkin nemese áskerı basymdyqty kórsetý arqyly qaqtyǵysty belgili bir sharttarmen aıaqtaýǵa jol ashýy yqtımal dep esepteıdi.
Atap ótilgendeı, tórt negizgi stsenarıı qarastyrylyp jatyr.
Birinshisi — Iran munaı eksportynyń negizgi toraptarynyń biri sanalatyn Harg aralyn basyp alý nemese ony buǵattaý.
Ekinshisi — Ormýz buǵazyndaǵy Larak aralynda operatsııa júrgizý. Bul aralda Irannyń teńiz qozǵalysyn baqylap otyratyn bazalary men radıolokatsııalyq júıeleri ornalasqan.
Úshinshi stsenarıı Abý-Mýsa aralyn basyp alýdy kózdeıdi. Bul aral Parsy shyǵanaǵynyń shyǵys bóliginde ornalasqan jáne kemelerdiń shyǵanaǵynan shyǵýyn baqylaýǵa múmkindik beredi. Ol, sondaı-aq, Úlken jáne Kishi Tomb araldarymen birge Birikken Arab Ámirlikteri tarapynan daýly aýmaq bolyp sanalady, biraq Iran baqylaýynda.
Tórtinshi nusqa — Iran munaıyn tasymaldaıtyn kemelerdi buǵattaý nemese olarǵa baqylaý ornatý.
Sonymen qatar, Axios deregine sáıkes, AQSh Iran aýmaǵyndaǵy joǵary baıytylǵan ýran qorlaryn qurlyq áskerin paıdalanyp basyp alý nemese tıisti nysandarǵa soqqy berý arqyly joıý josparlaryn da qarastyrýda.
Derekkózder AQSh prezıdenti Donald Tramp ázirge usynylǵan stsenarıılerdiń eshqaısysy boıynsha túpkilikti sheshim qabyldamaǵanyn atap ótedi.
Aıta keteıik, Qazaqstan Iran boıynsha beıbit kelissózderdi Túrkistan qalasynda ótkizýge daıyn ekenin rastaǵan bolatyn.
