AQSh Iranǵa qarsy qosymsha sanktsııalar engizdi

ASTANA. KAZINFORM — Tramp ákimshiligi Iranmen jańa kelisimge kelýdi jalǵastyryp jatqan kezde AQSh úsh ırandyq azamat jáne olarmen baılanysy bar ıadrolyq qarý-jaraq salasyndaǵy tehnologııalyq kompanııaǵa sanktsııa saldy, dep habarlaıdy Kazinform tilshisi. 

Memlekettik departament aqparatyna sáıkes, sanktsııalar kelesilerge qatysty engizilgen: 

* Saıed Mohammad Reza Seddıgı Saber — Irannyń qorǵanys ınnovatsııalary uıymy jáne ıadrolyq jarylǵysh jasaýda qoldanylatyn zertteýler men synaqtardy qosa alǵanda jobalar júrgizetin Shahid Karimi (SPND) zertteý tobynyń basshysy.

* Ahmad Hagıhat Talab — SPND joǵary sheneýnigi jáne buryn 2004 jylǵa deıin «Amad» ırandyq qarýlandyrý baǵdarlamasyna qatysqan atomshy ǵalym. Amerıkalyq sheneýnikter ony Irannyń ıadrolyq zertteýleri men ázirlemelerin ilgeriletý úshin ǵylymı tájirıbesin paıdalanýdy jalǵastyryp keledi dep aıyptap otyr.

* Mohammed Reza Mehdıpýr — ıadrolyq taqyrypta zertteýler júrgizgen Shahid Chamran SPND tobynyń basshysy bolyp taǵaıyndalǵan SPND qyzmetkeri.

Ideal Vacuum retinde belgili Fuya Pars Prospective Technologists — bul ıadrolyq qarýdy zertteý men ázirleýde qoldanýǵa bolatyn jabdyqty satyp alýǵa tyrysqan SPND enshiles kompanııasy.
Alaıda eki el arasyndaǵy yqtımal jańa ıadrolyq kelisim boıynsha kelissóz jalǵasyp jatyr, tórtinshi jáne sońǵy raýnd Omanda ótedi. 

Iran Syrtqy ister mınıstri Abbas Aragchı jeksenbi kúni tilshilerge eki jaq endi birin-biri jaqsyraq «túsinip otyrǵanyn», biraq sanktsııalardyń alynyp tastalýy men Tegerannyń ýrandy baıytýdy jalǵastyra alýy kedergi bolyp jatqanyn málimdedi. Ol ýrandy baıytý «sózsiz jalǵasýy kerek» ekenin atap ótti.