AQSh Irandaǵy IRSK nysandaryn shabýyldaýyn bastady
ASTANA. KAZINFORM – AQSh Ortalyq qolbasshylyǵy (CENTCOM) Irandaǵy Islam revolıýtsııasy saqshylar korpýsynyń (IRSK) nysandaryna shabýyl bastalǵanyn málimdedi, dep habarlaıdy Anadolý agenttigi.
Bul týraly CENTCOM amerıkalyq X áleýmettik jelisinde habarlady.
Málimdemede Irannyń Ormýz buǵazyndaǵy saýda kemelerine jáne aımaqtaǵy amerıkalyq qyzmetkerlerge «shabýyl jasaý áreketterine» baılanysty Islam revolıýtsııasy saqshylar korpýsynyń nysandaryna soqqy berý bastalǵany aıtylǵan.
AQSh tarapynan shabýyl jasalatyny týraly eskertýden keıin Irannyń buqaralyq aqparat quraldary Ormýz buǵazyndaǵy Keshm araly mańynda besten astam jarylys daýysy estilgenin habarlady.
Aıta keteıik, buǵan deıin Ormýzdaǵy shıelenis saldarynan 400 keme men 6 myń teńizshi Parsy shyǵanaǵynan shyǵa almaı otyrǵanyn jazdyq. Halyqaralyq teńiz uıymynyń málimetinshe, qaqtyǵys bastalǵaly halyqaralyq keme qatynasyna keminde 70 shabýyl jasalyp, 19 teńizshi qaza tapqan.
Sondaı-aq AQSh pen Iran arasyndaǵy soǵysqa alty aı tolǵanyn jáne qaqtyǵys nege tyǵyryqqa tirelgenin saralap kórdik.
Al dúıchenbi kúni AQSh birneshe aptadan beri alǵash ret Iranǵa shabýyl jasaǵany habarlandy. IRSK bul shabýyl Amerıkanyń Larak aralyna bergen soqqylaryna jaýap ekenin málimdedi. AQSh ókili jeksenbi kúni AQSh áskerı kúshteri Irannyń Larak aralyndaǵy ushyrý qondyrǵylaryna soqqy bergenin rastady. Bul shilde aıynyń sońynan bergi amerıkalyqtardyń Iranǵa jasaǵan alǵashqy shabýyly.
