AQSh Iranda ondaǵan nysanǵa soqqy jasady
ASTANA. KAZINFORM – AQSh pen Iran arasyndaǵy áskerı qaqtyǵys taǵy da ashyq soqqylar kezeńine ótti. Taraptar jańa eskalatsııadan keıin málimdemeler almasty, dep habarlaıdy Kazinform agenttiginiń Taıaý Shyǵystaǵy menshikti tilshisi.
AQSh qarýly kúshteri Irandaǵy IRSK-niń áskerı basqarý ortalyqtaryn qosa alǵanda ondaǵan nysanǵa, zymyran jáne dron nysandaryna, sondaı-aq jaǵalaýdaǵy qorǵanys nysandaryna jáne teńiz ınfraqurylymyna soqqy jasady.
AQSh QK Ortalyq qolbasshylyǵynyń (CENTCOM) málimetinshe, operatsııa Grınvııa boıynsha saǵat 00:00-de (Astana ýaqytymen 05:00) bastalyp, AQSh-tyń Iordanııadaǵy kúshterine zymyran shabýyly jasalýyna jaýap retinde shamamen eki saǵatqa sozyldy.
CENTCOM málimetinshe, operatsııanyń maqsaty «Iran men onyń odaqtastarynyń AQSh kúshterine, kommertsııalyq keme qatynasyna jáne kórshiles Parsy shyǵanaǵy memleketterine tóndiretin qaýipterin odan ári azaıtý» boldy. Qolbasshylyq sonymen qatar AQSh kúshterine atylǵan barlyq zymyrandardyń atyp túsirilgenin habarlady.
Irandyq BAQ Hormozgan, Hýzestan, Býsher jáne Fars sııaqty birneshe ońtústik provıntsııada jarylystar bolǵanyn habarlady. Sondaı-aq, Keshm men Kısh araldarynda, Abadan, Ahvaz jáne Kazerýn aýdandaryna soqqylar jasaldy.
Fars agenttiginiń habarlaýynsha, Keshm aralyndaǵy turǵyn úıge jasalǵan soqqydan úsh adam – erli-zaıyptylar men eki jasar bala qaza tapty. Zardap shekken taǵy eki bala aýrýhanaǵa jatqyzyldy.
BUU Bas hatshysy Antonıý Gýterrısh jańa eskalatsııa kezeńine alańdaýshylyq bildirip, AQSh pen Irandy soǵys qımyldaryn toqtatyp, dıplomatııalyq kúsh-jigerge qaıta oralýǵa shaqyrdy.
Osy arada Iordanııa qarýly kúshteri beısenbi kúni koroldikke baǵyttalǵan ırandyq bes zymyrandy qaǵyp alǵanyn habarlady. Iordanııa armııasy bir kún buryn áýe keńistiginde dál osynsha zymyrandy atyp túsirdi.
