AQSh Iran mańyndaǵy kemelerge tosqaýyl qoıa bastaıdy
ASTANA. KAZINFORM — Amerıkalyq áskerı kúshter 13 sáýirde Iran mańyndaǵy teńiz qatynasyn shekteý sharalaryn engizedi, dep habarlaıdy TASS.
Amerıkanyń Qarýly kúshteri 13 sáýirden bastap AQSh Ortalyq qolbasshylyǵy (CENTCOM) «teńiz blokadasy» dep ataǵan áreketterge kirisedi. Bul sharalar Iran porttarymen baılanysy bar barlyq kemeniń qozǵalysyn shekteýge baǵyttalǵan.
Shekteýlerge tirkelgen eline qaramastan, Iran porttaryna kirip-shyǵatyn barlyq keme iligedi.
CENTCOM málimdemesinde operatsııalar AQSh-tyń shyǵys jaǵalaýy ýaqyty boıynsha saǵat 10:00–de bastalatyny aıtylǵan.
— CENTCOM kúshteri prezıdent jarlyǵyna sáıkes Iran porttaryna kiretin jáne shyǵatyn búkil teńiz qozǵalysyna blokada bastaıdy, — delingen habarlamada.
Sondaı-aq áreketterdiń ámbebap sıpatta bolatyny jáne barlyq elderdiń kemelerine taralatyny atap ótildi.
AQSh prezıdenti Donald Tramp Fox News-ke bergen suhbatynda birqatar memleket Vashıngton bastamasyn qoldaýy múmkin ekenin aıtty. Onyń sózinshe, sharalardyń maqsaty — Irannyń munaı eksportynan túsetin tabysyn shekteý.
— Biz Iranǵa ózine unaǵan elderge munaı satyp, tabys tabýyna jol bermeımiz, — dedi Tramp.
Buǵan deıin Iran Islam revolıýtsııasy saqshylar korpýsy Ormýz buǵazyndaǵy keme qozǵalysyn tolyq baqylaýda ustap otyrǵanyn habarlaǵan. Tegeran bul strategııalyq mańyzdy aımaqta áskerı-teńiz kúshteri jaǵdaıdy tolyq baqylap otyrǵanyn málimdedi.
Aıta keteıik, Iran men AQSh Pákistandaǵy kelissózderde soǵysty toqtatý týraly kelisimge kele almady.
