AQSh Iran munaıyn tasymaldaýǵa kómektesken zań fırmasyna sanktsııa engizdi
ASTANA. KAZINFORM — AQSh Qarjy mınıstrligi Grekııa men Panamada keńseleri bar Karnakis and Karnakis zań fırmasyna sanktsııa engizdi. Kompanııa Iran munaıy men ózge de ónimderdi amerıkalyq shekteýlerdi aınalyp ótip tasymaldaýǵa kómektesti dep aıyptalyp otyr. Bul týraly AQSh Qarjy mınıstrligi habarlady.
Vedomstvonyń málimetinshe, shekteýler Iran ónimderiniń eksportyn qamtamasyz etetin jáne sanktsııalardy aınalyp ótýge kómektesetin jelilerge qarsy baǵyttalǵan Economic Outcast operatsııasy aıasynda engizildi.
AQSh Qarjy mınıstrliginiń málimdeýinshe, Karnakis and Karnakis birneshe jyl boıy «kóleńkeli flotqa» kiretin kemelerge ıelik etken keme qatynasy kompanııalaryn tirkeýmen aınalysqan. Osy qurylymdar arqyly júzdegen mıllıon dollardyń ırandyq munaıy, munaı ónimderi, munaı-hımııa taýarlary men bolaty tasymaldanǵan.
Vedomstvo ókilderiniń pikirinshe, mundaı áreketter Tegeranǵa tabys tabýǵa múmkindik bergen. Bul qarajat áskerı baǵdarlamalardy qarjylandyrýǵa, qarý-jaraq ázirleýge jáne ıadrolyq baǵdarlamany damytýǵa jumsalýy múmkin.
Sanktsııalyq tizimge zań fırmasymen baılanysty 5 jeke tulǵa, sonyń ishinde kompanııa ıeleri men qyzmetkerleri de engizildi.
Budan bólek, AQSh bıligi Qarjy mınıstrliginiń dereginshe, Iran ónimderin tasymaldaýǵa kómektesken Sıngapýr men Birikken Arab Ámirlikterindegi keme qatynasy kompanııalaryna da shekteý qoıdy.
Sanktsııalyq tizimge munaı-hımııa ónimderi men Irannan shyqqan ózge de taýarlardy tasymaldaǵan júk kemeleri de engizilgen.
Sanktsııa salynǵan tulǵalar men kompanııalardyń AQSh aýmaǵyndaǵy nemese amerıkalyq tulǵalardyń baqylaýyndaǵy aktıvteri buǵattalady. Sondaı-aq arnaıy ruqsatsyz olarmen qarjylyq operatsııalardyń basym bóligine tyıym salynady.
AQSh Qarjy mınıstrligi sanktsııalardy aınalyp ótý shemalaryn anyqtaý jáne Irannyń kiris kózderin shekteý maqsatynda halyqaralyq seriktestermen jumysty jalǵastyratynyn málimdedi.
Eske sala keteıik, buǵan deıin AQSh Iranǵa qatysty jańa sanktsııalar engizgen bolatyn.
