AQSh Iraktaǵy áskerı mıssııasyn jyl sońyna deıin toqtatady

VAShINGTON. QazAqparat – AQSh prezıdenti Djo Baıden men Irak premer-mınıstri Mustafa ál-Kazymı Iraktaǵy amerıkalyq áskerı mıssııany toqtatý týraly kelisimge qol qoıdy, dep habarlaıdy QazAqparat Reuters agenttigine silteme jasap.

Qol qoıylǵan kelisimge sáıkes, AQSh Iraktaǵy áskerı mıssııasyn osy jyldyń sońyna deıin resmı túrde aıaqtaıdy. Bul – Amerıka áskerleri alǵash ret elge jiberilgennen keıin 18 jyl ótken soń bolǵaly turǵan oqıǵa.

AQSh prezıdenti Djo Baıden men Irak premer-mınıstri Mustafa ál-Kazymı arasyndaǵy alǵashqy betpe-bet kezdesý elderdiń strategııalyq dıalogy aıasynda Aq úıde ótti.

«Bizdiń Iraktaǵy mıssııamyz jalǵasady. Birlesken jattyǵýlardy jalǵastyramyz, terrorıstik toptarǵa qarsy kúreske kómektesip, qajetti jaǵdaılardy jasaımyz. Alaıda osy jyldyń sońyna deıin áskerı mıssııamyzdy toqtata turamyz», – dedi Djo Baıden.

Qazirgi tańda Irakta DAISh oshaqtarymen kúresýge qatysatyn 2500 AQSh áskerı kúshteri bar. Kelisimge qol qoıylǵannan keıin AQSh-tyń róli Irak armııasyna ony qorǵaýǵa daıyndyq pen qoldaý kórsetý bolady. Alaıda Irakta qalatyn ásker sany týraly málimetter habarlanbady.

Irak pen AQSh-tyń birlesken málimdemesinde densaýlyq saqtaý, energııa jáne basqa da máseleler týraly kelisimder aıtyldy.

AQSh Irakqa COVAX baǵdarlamasy aıasynda 500 000 Pfizer/BioNTech vaktsınalaryn jetkizýge nıetti.

Amerıka prezıdentiniń aıtýynsha, jetkizý jumystary birneshe apta ishinde júzege asyrylady.

Sondaı-aq AQSh qazan aıynda BUU-nyń Iraktaǵy aldaǵy saılaýdy baqylaý mıssııasyn qarjylandyrý úshin 5,2 mıllıon dollar bóledi.

Buǵan deıin Irak parlamenti úkimetti AQSh áskerleri men basqa shet memleketterdiń qarýly kúshterin elden shyǵarýǵa shaqyrǵany týraly habarlanǵan bolatyn.