AQSh Iraktaǵy DAISh-ke qarsy mıssııasyn aıaqtady
ASTANA. KAZINFORM — Iraktaǵy DAISh-ke (IM, IShIM — Qazaqstanda tyıym salynǵan uıym — red.) qarsy kúreske qatysqan AQSh-tyń sońǵy áskerı kúshteri sársenbi kúni elden shyǵaryldy, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
Osylaısha, ekstremıstik topty joıýǵa baǵyttalǵan amerıkalyq áskerı mıssııa óz máresine jetti.
— Biz halıfatpen kúresý úshin keldik. Qazir halıfat joq, sondyqtan elge qaıtyp baramyz. Bul — AQSh-tyń jeńisi. DAISh-ti tolyq joıyp, sheshýshi jeńiske jettik, — dedi AQSh prezıdenti Donald Tramp sársenbi kúni Aq úıde.
Pentagonnyń resmı ókili Shon Parnell sársenbi kúni jarııalaǵan málimdemesinde «áskerdiń júıeli túrde shyǵarylýy Iraktaǵy DAISh-ti talqandaýǵa baǵyttalǵan áskerı mıssııanyń sátti aıaqtalǵanyn bildiredi» dedi. Onyń aıtýynsha, bul — 12 jylǵa sozylǵan áskerı naýqannyń nátıjesi. Sonyń arqasynda DAISh Irakta jáne búkil óńirde uıymdasqan áskerı qaýip tóndiretin kúsh bolýdan qaldy».
BUU-nyń tamyz aıyndaǵy esebine sáıkes, DAISh-tiń jeti provıntsııalyq bólimshesinde júzdegen sodyr bar. Uıym shóldi aımaqtarda ǵana boı kórsetip, fermerler men malshylardan aqsha bopsalaý arqyly jylyna shamamen 500 myń dollar tabys tabady.
Alaıda uıymnyń birqatar jetekshisi qaza taýyp, basqalary tutqyndalǵannan keıin, DAISh aýqymdy shabýyldar jasaý múmkindiginen aıyrylǵan. Qazir top tek shaǵyn ári qarapaıym operatsııalar júrgize alady.
Parnelldiń málimdeýinshe, endi Irak pen kúrd kúshteri «eldegi qaýipsizdikti qamtamasyz etý jáne DAISh-tiń qalǵan kúshterin joıý jónindegi jumystarǵa jetekshilik etedi».
Al Pentagon «Iraktaǵy seriktesterine arnaıy daıyndyq ótkizip, barlaý aqparatyn usynýdy jalǵastyrady». Alaıda Iraktyń soltústigindegi kúrd bıligi bul qadamǵa alańdaýshylyq tanytty. AQSh áskerin almastyratyn qorǵanys júıesi qurylmaı jatyp, áskerdiń elden shyǵarylýy «asa alańdatarlyq jaǵdaı» dep baǵalandy.
Iran qoldaıtyn qarýly toptar AQSh áskeriniń Iraktan shyǵarylýyn «tarıhı jeńis» dep baǵalady. «Irak ıslam qarsylyǵy» tobynyń qolbasshysy Ábý Modjtaba ál-ıAsırı bul oqıǵany «AQSh-tyń Iraktaǵy saıasatynyń kúıreýi» dep atady.
Buǵan deıin halyqaralyq koalıtsııa Irakqa barlyq bazasy men shtabtaryn tapsyrǵanyn habarlaǵan bolatynbyz.
