AQSh ınvestorlary Qostanaıda júgeri ósirmek
QOSTANAI. QazAqparat -Qostanaı oblysynyń ákimi Arhımed Muhambetov AQSh ınvestorlarymen kezdesti, dep habarlaıdy «QazAqparat» HAA tilshisi.
Buǵan deıin habarlaǵanymyzdaı, Qostanaı oblysyna AQSh-tan ınvestorlar kelip, óńirdiń ekonomıkalyq áleýetimen tanysqan edi. Delegattar aýylsharýashylyq ónimderin óńdeıtin jáne azyq-túlik ónimderin shyǵaratyn birqatar kásiporynda bolyp úlgerdi. Atap aıtqanda, olar «MILH», «Sadchıkovskıı», «Qarasý-Et» syndy seriktestikterdiń jumysymen tanysty.
Búgin meımandar oblys ákimi Arhımed Muhambetovtiń qatysýymen ekijaqty áriptestik máselelerin ortaǵa saldy.
Sheteldik delegatsııamen birge Qostanaıǵa KUSTO GROU Dırektorlar Keńesiniń tóraǵasy Erkin Tátishev te keldi. Onyń sózinshe, Qostnaı oblysynyń ınvestıtsııalyq áleýeti óte joǵary.
Sondaı-aq, 10-15 jyl ónimdi yntymaqtastyq aıasynda bári de ózgerýi múmkin. Erkin Tátishev muny elge «Shevron» kompanııasynyń kirýin jáne Qazaqstannyń munaı salasynyń tolyqtaı ózgerýimen salystyrýǵa bolatynyn aıtty.
Al AQSh delegatsııanyń jetekshisi, TysonFreshMeatInc kompanııasynyń basshysy Garold Dın Sandorskı bizdiń óńirmen áriptestik ornatý týraly josparlarymen bólisti.
«Bizde kúnine 28 myń bas sıyrdyń etin óńdeıtin alty zaýyt jumys isteıdi. Al aptalyq ónimdiligi - 180 myń bas. Ózderińiz kórip otyrǵandaı, bul degenińiz eleýli kórsetkish. Sonymen qatar, shoshqa etin óndiretin jeti zaýyt bar, naqtylaı aıtqanda, kúnine 16 myń bas shoshqanyń eti atalmysh tsehtar qolynan ótedi. Buǵan qosa, taýyq eti óndirisi de jaqsy jolǵa qoıylǵan. Aptasyna 25 mln bas taýyqtyń eti suranys núktelerin qanaǵattandyrady. Bizdiń basty maqsatymyz - zamanaýı talaptarǵa jaýap bere alatyn kompanııaǵa aınalý. Sondyqtan biz sizderdiń aımaqtaryńyzǵa ınvestıtsııa salyp, kásipti damyta alamyz dep oılaımyn. Bir jaǵynan, aımaqtyń topyraǵynyń qunarly ekenine kózimiz jetti. Mol ónim berýi múmkin. Buǵan qosa jas mamandaryńyzdy ózimizdiń tehnologııanyń tiline úıretemiz, sol arqyly eki jaqqa da paıdaly nátıjelerdi kóretinimizge senimdimin», - dedi Garold Dın Sandorskı.
Áriptesterdiń bir kózdegeni oblysta ırrıgatsııalyq jumystar jáne júgerini ósirýdi damytý. Óıtkeni, jeke kombıkorm - AQSh kompanııasy jumysynyń negizgi tiregi.
Oblys ákimi Arhımed Muhambetov atap ótkendeı, barlyq memlekettik qoldaý sharalary mindetti túrde kórsetiletin bolady. Investorlarǵa barlyq jaǵdaı jasalmaq.
