AQSh ınvestorlary Arysta ónim egip, mal sharýashylyǵyn damytpaq
Mysyr elinde eńbek etken ınsvestorlar endi jańa jobany Túrkistan oblysynda júzege asyrady. Oblys ákimi Ómirzaq Shókeev atalǵan jobany qoldap, onyń barlyq aýdandar úshin úlgi bolaryna senim bildirdi. Óndiris alqaby kún qýatyn paıdalanýdy kózdeıdi. Jańa joba Arys qalasynyń ákimi Murat Qadyrbektiń 2019 jyldyń qorytyndysy boıynsha atqarǵan jumystarynyń esebinde tanystyryldy.
Arysta oryn alǵan tótenshe jaǵdaıdyń saldaryn joıý men qalany qalpyna keltirýde ulan-ǵaıyr ister atqaryldy. Memleket basshysy Qasym-Jomart Toqaevtyń Arys qalasyn tolyq qalpyna keltirý týraly tapsyrmasyna sáıkes, «Samuryq-Qazyna» Ulttyq ál-aýqat qory arqyly 66 áleýmettik nysan qalpyna keltirildi. Onyń ishinde 4 nysan jańadan salynyp, 62 nysanǵa kúrdeli jóndeý júrgizildi. Ortalyq alań, ortalyq stadıon, Batyrlar alleıasy men «Arys-1» temirjol vokzalyna qaıta qurylymdaý jumystary júrgizildi.
7154 úı jóndelip, 500-ge jýyǵy qaıta salyndy. Demeýshiler qorynan 100 otbasyǵa arnalǵan jańa úıler boı kóterdi. Kásipkerlik nysandardy qalpyna keltirý boıynsha 480 zardap shekken kásipkerlik nysan ıelerine ótemaqy berilip, tolyǵymen qalpyna keltirildi. Sonymen birge, 63 kóshede jóndeý jumystary tolyq aıaqtaldy, ortalyq qazandyq, káriz júıesi de jóndeýden ótti. Osylaısha tutas bir qala qaıta jandandy.
«Qamqor» baǵdarlamasy aıasynda 1% mólsherde 63 kásipkerge 195 mln teńge nesıe berilgen. 62000 turǵynǵa 6 mlrd 200 mln teńge materıaldyq kómek retinde qarjy tólendi.
Qalanyń «Kóktem-2» turǵyn aýdanynda 36 páterlik №4,5,6 turǵyn úılerdiń qurylysy jáne aýmaǵyn abattandyrý jumystary tolyǵymen aıaqtalǵan. Osy aýdannan taǵy da 5 qabatty 60 páterli 2 turǵyn úıdiń qurylysy bastaldy. Nátıjesinde bıyl 228 otbasy baspanaly bolady. «Nurly Jer» turǵyn úı baǵdarlamasymen 60 páterli 5 qabatty 3 turǵyn úı qurylysyn júrgizý úshin qajetti qarjyǵa suranys berilgen.
