AQSh ımmıgratsııalyq emes vızalardy berý tártibin qatańdatty

ASTANA. KAZINFORM — Jańa erejege sáıkes, Reseı azamattary AQSh-qa týrıstik vızaǵa tek Astana men Varshavada, Belarýs azamattary — Varshava men Vılnıýste, al Ýkraına azamattary Varshava men Krakovta ǵana ótinish bere alady, dep habarlaıdy DW. 

AQSh úkimeti sheteldikterge ımmıgratsııalyq emes vızalardy, sonyń ishinde B1/B2 týrıstik vızalaryn berý erejelerin qatańdatty.

Memlekettik departament senbi, 6 qyrkúıekte jarııalaǵan buıryqqa sáıkes, endi olardy alýǵa qujattardy tek azamattyǵy bar nemese turaqty turatyn elinde ǵana ótinish berýge bolady.

Bul rette mundaı vızalardy berý toqtatylǵan 17 eldiń azamattary úshin olar ótinish bere alatyn belgili elshilikter men konsýldyqtar belgilendi. Osylaısha, reseılikter muny tek Astana men Varshavadaǵy AQSh elshilikterinde, Belarýs azamattary — Varshava nemese Vılnıýste, al Ýkraına azamattary Varshava men Krakovta jasaı alady.

Osy ýaqytqa deıin kez kelgen elde áńgimelesýden ótip, vızanyń bul túrine ótinish berýge bolatyn edi. Josparlanǵan áńgimelesýler óz kúshinde qalady.

Jańa erejeler A, G, C-2, C-3 vızalaryna, NATO vızalaryna, sondaı-aq kez kelgen túrdegi dıplomatııalyq jáne qyzmettik vızalarǵa nemese BUU shtab-páteri týraly kelisimde qamtylǵan saparǵa qatysty vızalarǵa qoldanylmaıdy. Memlekettik departamenttiń málimdemesinde sırek jaǵdaılarda gýmanıtarlyq, medıtsınalyq nemese syrtqy saıası sebepterge baılanysty erekshelikter jasalýy múmkin ekendigi aıtylǵan.

Buǵan deıin Tramp ákimshiligi stýdentter men jýrnalıster úshin vıza tártibin kúsheıtetinin jazǵan bolatynbyz.