AQSh HKS-tyń tórt múshesine jańa sanktsııa saldy

ASTANA.KAZINFORM — AQSh Halyqaralyq qylmystyq sottyń (HQS) taǵy tórt ókiline sanktsııa salady. Tıisti sheshim eldiń Memlekettik departamenti men Qarjy mınıstrliginiń saıttarynda jarııalandy, dep habarlaıdy Kazinform. 

Sanktsııalar tiziminde:

Kanadalyq sýdıa Kımberlı Prost;

Frantsııalyq sýdıa Nıkolıa Gııý;

Fıdjılik HQS prokýrorynyń orynbasary Najat Shamım Han;

Senegaldyq HQS prokýrorynyń orynbasary Mandıaı Nıang bar.

Memlekettik departament bul tulǵalarǵa sanktsııa salynýyn olardyń Aýǵanstandaǵy amerıkalyq áskerı qyzmetshilerdi tergeý jáne Izraıl premer-mınıstri Bınıamın Netanıahýdy tutqyndaý týraly order berý sheshimderimen baılanysty dep túsindirdi, sonymen qatar «Olar HQS-tyń Izraılge qarsy zańsyz áreketterin qoldady» dep aıyptady.

— Joǵaryda atalǵan tulǵalardyń Amerıka Qurama Shtattarynda ornalasqan nemese AQSh azamattarynyń ıeligindegi nemese baqylaýyndaǵy barlyq múlki men múliktik quqyqtary buǵattalǵan, — delingen habarlamada.

Osy jyldyń basynda Amerıka Qurama Shtattary HQS-tyń taǵy tórt sýdıasy men prokýroryna qarsy sanktsııa jarııalady.

BUU qoldaǵan sot AQSh-tyń sheshimin «beıtarap sot organynyń táýelsizdigine jasalǵan ashyq shabýyl» dep aıyptady.

HQS genotsıd, soǵys qylmystary, adamzatqa qarsy qylmys jáne agressııa qylmystary sııaqty halyqaralyq qoǵamdastyqty alańdatatyn asa aýyr qylmystardy tergeıdi.

Buǵan deıin biz HQS Talıban qozǵalysynyń jetekshisi men bas sýdıasyn qamaýǵa alýǵa order bergenin jazǵan bolatynbyz.