AQSh: Harrıs úsh negizgi shtatta Trampty basyp ozdy

ASTANA. KAZINFORM – Kamala Harrıs Mıchıgan, Vıskonsın jáne Pensılvanııa shtattarynda Donald Tramptan 4%-ǵa alda kele jatyr. Svıng shtattaryndaǵy saılaýshylardyń 50%-y AQSh vıtse-prezıdentin, 46%-y burynǵy prezıdentti qoldaǵan. 

10 tamyzda The New York Times gazeti men Siena College zertteý ınstıtýty jarııalaǵan saýalnama nátıjeleri boıynsha Amerıka Qurama Shtattarynyń vıtse-prezıdenti, Demokratııalyq partııadan prezıdenttikke úmitker Kamala Harrıs úsh mańyzdy shtatta – Mıchıgan, Vıskonsın jáne Pensılvanııada respýblıkashyl kandıdat Donald Tramptan basym tústi. 

Saýalnama 5-9 tamyzda ótken. NYT habarlaýynsha, Harrıstiń Pensılvanııadaǵy reıtıngi bir aıda 10%-ǵa ósken.

Basylym vıtse-prezıdenttiń tabysyn onyń jýyrdaǵy saılaý naýqany kezinde Mıchıgan, Vıskonsın jáne Pensılvanııaǵa jasaǵan saparymen baılanystyrady. Saılaýshylarmen, sonyń ishinde vıtse-prezıdenttikke kandıdat Tım Valtspen kezdesýlerde Harrıs klımattyń ózgerýine qatysty ustanymy úshin respýblıkalyq qarsylasyn synǵa aldy. Degenmen, saýalnamaǵa sáıkes, basqa shtattardaǵy saılaýshylar AQSh úshin eń ózekti máseleler sanalatyn ımmıgratsııa men ekonomıkada áli de Trampty qoldaıdy.

Saýalnamaǵa qatysqan saılaýshylardyń 47%-y Tramptan el úshin «óte jaman» bolatyn ózgeristerdi kútetinin aıtqan, al Harrıs týraly dál osylaı aıtqandar 37%-dy qurap otyr. Saılaýshylar sonymen qatar vıtse-prezıdentti Trampqa qaraǵanda AQSh prezıdenttigine ıntellektýaldy jáne temperamentti úmitker dep sanaıdy. 

Aıta keteıik, AQSh prezıdenttigine úmitkerler Kamala Harrıs pen Donald Tramp 10 qyrkúıekte teledebatta kezdesedi.