AQSh HAMAS-tyń Gazadaǵy atysty toqtatý rejımin buzýy múmkin ekenin habarlady

ASTANA. KAZINFORM – AQSh Gazadaǵy beıbit kelisimdi qamtamasyz etýshi elderge HAMAS uıymy tarapynan atysty toqtatý rejıminiń «múmkin ári taıaý arada» buzylatynyn habarlady, dep jazady Kazinform AQSh Memlekettik departamentine silteme jasap.

– Amerıka Qurama Shtattary Gazadaǵy beıbit kelisimniń kepilgeri sanalatyn elderge Gazadaǵy atysty toqtatý rejıminiń HAMAS tarapynan buzylýy yqtımal ekenin kórsetetin senimdi derekterdi jarııalady, – delingen vedomstvonyń resmı saıtyndaǵy habarlamada.

Memlekettik departamenttiń málimetinshe, «beıbit palestınalyqtarǵa qarsy josparlanǵan shabýyl» atysty toqtatý týraly kelisimniń «tikeleı jáne eleýli» buzylýy retinde qarastyrylyp, osy ýaqytqa deıingi jetistikterge qaýip tóndiredi.

«Eger HAMAS bul shabýyldy jalǵastyrsa, Gaza halqyna qaýipsizdik pen atysty toqtatý rejıminiń tutastyǵyn saqtaý maqsatynda qajetti sharalar qabyldanbaq», dep atap ótti AQSh Syrtqy ister mınıstrligi.

AQSh Memlekettik departamenti taratqan málimdemede AQSh pen basqa da kepilger elderdiń «beıbit turǵyndardyń qaýipsizdigin qamtamasyz etýge, jergilikti turaqtylyqty saqtaýǵa, sondaı-aq Gaza turǵyndary men búkil aımaq úshin beıbitshilik pen órkendeýdi ilgeriletýge» degen ustanymy ózgermegeni aıtylǵan.

Aıta ketsek, buǵan deıin Donald Tramp HAMAS uıymyn kúshpen qarýsyzdandyratynyn málimdegen edi. Sondaı-aq ol Truth Social áleýmettik jelisindegi paraqshasynda Gaza sektory boıynsha beıbit kelisimniń ekinshi kezeńi bastalǵanyn da jarııalaǵan.