AQSh Halyqaralyq medıalyq etıka ortalyǵy Qazaqstanmen áriptestik qarym-qatynas ornatýǵa múddeli
ASTANA. 21 qarasha. QazAqparat - Búgin Astana qalasyndaǵy Qazaq agrarlyq ýnıversıtetinde Tuńǵysh Prezıdent kúnine oraılastyrylyp «Bas redaktorlar klýby» respýblıkalyq qoǵamdyq birlestiginiń bes jyldyǵy aıasynda atalmysh oqý ornynyń stýdentteriniń qatysýymen flesh-mob ótkizildi.
Bul is-sharanyń basty taqyryby jýyrda táýelsiz memleketimiz tarıhynda tuńǵysh ret qabyldanǵan «Qazaqstan Respýblıkasy jýrnalısteriniń etıkalyq kodeksi» bolyp belgilendi. Sondaı-aq, atalmysh sharany uıymdastyrýǵa Qazaqstandy taıaýda óziniń áriptesi retinde tanyǵan bas keńsesi AQSh-ta, al ókildikteri London men Brıýssel qalalarynda ornalasqan Halyqaralyq medıalyq etıka ortalyǵy múddelilik tanytýda. Flesh-mob boıynsha daıyndalǵan aqparattardyń barlyǵy osy ortalyqqa jiberiledi jáne onyń kómegimen ǵalamtor arqyly Eýrazııa men Amerıka elderine taratylatyn bolady.
Sharanyń ashylý saltanatynda sóz sóılegen ýnıversıtet rektory Aqylbek Kúrishbaev jýrnalısterdiń qoǵamda alatyn ornyn aıta kele, «Bas redaktorlar klýbynyń» 5 jyldyq mereıtoıymen quttyqtady.
«Baspasóz adamnyń aqyly men júregine erekshe áser etedi. Sondyqtan da órkenıetti qoǵamda sóz, qoǵam jáne ar jaýapkershiligin arqalaǵan maıtalman jýrnalısterdi árdaıym maqtan tutamyz. Joǵary kásibı sheberlikti ıgere otyryp, únemi dáýir únimen tynystaý, qazirgideı qaryshtap damyǵan ýaqytta halyqtyń qýanyshy men qaıǵysyn bólisý, olardy jańa asýlar men shyńdarǵa tartý sizderdiń qoldaryńyzdan keledi. qazirgi dáýirdiń jylnamashysy jáne tórtinshi bılik ókili retinde táýelsiz elimizdiń damýyna, ósip-órkendeýine qomaqty úles qosyp júrsizder», - dep atap ótti ol.
Shara aıasynda «Bas redaktorlar klýbynyń prezıdenti Kenjebolat Joldybaı jáne klýbtyń basqa da múshelerimen stýdentterdiń arasynda ashyq pikiralmasý alańy ornap, stýdentter ózderin tolǵandyryp júrgen suraqtaryna tuşymdy jaýap aldy. Bas redaktorlar klýbymen áriptestik baılanys ornatyp, sheberlik saǵattaryn jáne ózge de ádistemelik turǵydaǵy sharalardy turaqty túrde ótkizip otyrý úshin ýnıversıtettiń «Jas túlek» shyǵarmashylyq birlestigi men klýb arasynda áriptestik memorandýmǵa qol qoıyldy.
