AQSh halqy Qazaqstan týraly bile bermeıtin - amerıkalyq tilshi
TALDYQORǴAN. QazAqparat - Almaty oblysynyń ákimi Amandyq Batalov AQSh-tyń «Foreign Affairs» jýrnalyna suhbat berdi. Jetisý óńirine jýrnaldyń jobalyq dırektory, halyqaralyq sanattaǵy jýrnalıst Ignasıo Goeneke arnaıy kelip, suraqtaryna jaýap aldy, dep habarlaıdy QazAqparat tilshisi.
Amandyq Ǵabbasuly álemde analogy joqqa tán «Qurǵaq port, «Qorǵas erkin ekonomıkalyq aımaǵy», «Batys Eýropa - Batys Qytaı» tranzıttik dálizi jaıly tereń áńgimelep berdi. Jetisý óńiriniń ınvestıtsııalyq múmkindikterin de aıtyp ótti. Suhbat ekonomıka, saıasat, qoǵam, áleýmet salalarynda órbidi.
Sońynda Ignasıo Goeneke: «Siz qaı kezde ózińizdi baqytty sezinesiz?», - degen saýal qoıdy. Ákim: «Halyqqa tıimdi is jasap, kózderindegi rızashylyǵyn kórgende», - dep jaýap berdi.
Amerıkalyq jýrnalıst buǵan deıin Astanada bolyp, birqatar laýazymdy tulǵalar men qarjylyq ınstıtýt basshylarynan suhbat alǵan.
«Shyny kerek, AQSh halqy Qazaqstan týraly bile bermeıtin. Nursultan Nazarbaevtyń bitimgerlik ustanymy onyń tulǵasyna degen, memleketine degen qyzyǵýshylyqty oıatty. Bizdiń jýrnal osy bir olqy tusty toltyryp, Qazaqstan jaıynda materıaldar toptamasyn jarııalamaq. Respýblıkanyń eń iri agroónerkásiptik aımaǵy retinde tańdaýymyz Almaty oblysyna tústi. Amandyq Batalov myrzanyń da iskerligi jaıynda estip-bildik. Bul suhbat ta AQSh pen Qazaqstan arasyndaǵy baılanystyń artýyna yqpal etedi degen senimdemin.Batalov myrza mamandyǵy qurylysshy bola tura, saıasat pen ekonomıkada jan-jaqty ekenin kórsetti. Rızamyn! Maqala mamyrda basylady. Almaty oblysyna biraz danasyn jiberemiz», - dedi «Foreign Affairs» jýrnalynyń jobalyq dırektory, jýrnalıst Ignasıo Goeneke.
Aıta ketý kereý, «Forın Affers» - 100 jyldyq tarıhy bar bedeldi jýrnal. Negizin 1920 jyldary amerıkalyq belgili jýrnalıst Kerı Archıbald qalaǵan. Tırajy - 170 myń dana. Elektrondy nusqasynyń oqyrmandary 2,5 mln-nan asady. Ustanymy - AQSh-tyń syrtqy saıasaty, halyqaralyq qatynastar.
