AQSh Grenlandııanyń bir bóligin áskerı bazalar úshin baqylaýyna alýy múmkin

ASTANA. KAZINFORM — AQSh Danııamen bolashaqta jasalýy múmkin kelisim aıasynda Grenlandııa aýmaǵynyń jekelegen ýchaskelerine baqylaý ornatýy yqtımal. Bul týraly TASS habarlady.

The New York Times silteme jasap otyrǵan derekkózderine súıensek, AQSh prezıdenti Donald Tramptyń 21 qańtarda kelisimniń negizi daıyndalyp jatqany týraly málimdemesinen az ýaqyt buryn NATO-ǵa múshe elderdiń áskerı sheneýnikteri ymyraly nusqany talqylaǵan. Ol boıynsha Danııa AQSh-qa áskerı bazalar ornalastyrý úshin grenland jeriniń shaǵyn bólikterine sýverenıtet berýi múmkin.

NYT-ke aty-jónin atamaǵan úsh derekkóz bul nusqany NATO-nyń bas hatshysy Mark Rıýtte qoldaǵanyn aıtty. Olar usynylyp otyrǵan shemany Ulybrıtanııanyń Kıprdegi, formaldy túrde Ulybrıtanııanyń teńiz asyp jatqan aýmaǵy bolyp sanalatyn áskerı bazalarymen salystyrdy.

Sonymen qatar, bul ıdeıa Tramp jarııalaǵan tujyrymdamaǵa kire me, joq pa — ázirge belgisiz, dep naqtylaıdy NYT. AQSh prezıdenti «Grenlandııaǵa jáne jalpy Arktıka aımaǵyna qatysty bolashaq kelisimniń negizi ázirlendi» dep málimdegenimen, egjeı-tegjeıin ashpaı, sharttardy keıinirek túsindiretinin aıtqan.

Eske sala keteıik, Grenlandııa — Danııa quramyndaǵy avtonomdy aýmaq. 1951 jyly AQSh pen Danııa Grenlandııany qorǵaý týraly kelisimge qol qoıǵan, oǵan sáıkes AQSh NATO sheńberindegi mindettemelerden bólek, araldy yqtımal agressııadan qorǵaýǵa mindettengen.

Buǵan deıin Tramp NATO bas hatshysymen kelissózderden keıin EO-nyń segiz eline qatysty baj salyǵyn engizýdi toqtatqanyn habarlaǵan edi. Bul málimdeme Davosta jasaldy, onda ol Grenlandııanyń AQSh úshin ulttyq jáne jahandyq qaýipsizdik turǵysynan qajet ekenin aıtqan. Davosta AQSh-tyń Grenlandııaǵa qatysty talaptary talqylanǵan tusta Germanııanyń burynǵy mınıstri Peter Gaývaıler araldy 1 trln dollarǵa satý týraly usynys bildirgen.