AQSh Grenlandııanyń ár turǵynyna 100 myń dollar tólep, araldy satyp almaq
ASTANA. KAZINFORM — Amerıka sheneýnikteri araldyń Danııadan bólinýi jáne AQSh-tyń anneksııalanýy týraly talqylaýlar barysynda Grenlandııa turǵyndaryna bir rettik tólem jasaý múmkindigin qarastyrdy, dep habarlaıdy Reuters.
Bul aqparat tórt derekkózde habarlandy. Talqylaýda bir adamǵa 10 000 dollardan 100 000 dollarǵa deıingi soma berý máselesi qaralǵan. Degenmen, tólemderdiń naqty mólsheri men ony júzege asyrý mehanızmi áli túsiniksiz. Bul kelissózderge Aq úıdiń kómekshileri de qatysqan.
Danııanyń avtonomdy aýmaǵy bolyp tabylatyn Grenlandııa turǵyndaryna tikeleı tólem jasaý ıdeıasy, AQSh-tyń 57 myńǵa jýyq turǵyny bar araldy qalaı baqylaýǵa alýǵa bolatyn nusqalardyń biri retinde qarastyrylady. Bul Kopengagen men Nýýktaǵy bıliktiń «Grenlandııa satylmaıdy» degen málimdemesiniń aıasynda oryn alady.
Talqylanǵan bastama Aq úıde qarastyrylǵan ártúrli stsenarıılerdiń biri bolyp otyr. Bul AQSh-tyń aımaqtaǵy yqpalyn kúsheıtýdiń joly retinde qarastyrylǵan. Sonymen qatar, mundaı taktıkany uzaq ýaqyt boıy óziniń táýelsizdigi men Danııanyń ekonomıkalyq táýeldilik máselelerin talqylaıtyn halyq úshin "qorlaý" dep qabyldaýǵa bolady.
Donald Tramp buǵan deıin Grenlandııanyń AQSh-qa qosylýy qajettigin birneshe ret aıtqan bolatyn. Alǵashqyda ol araldy satyp alýdy usyndy jáne 2025 jyldyń naýryzynda onyń anneksııalanatynyna senim bildirdi. Eger bas tartsa, Danııany saýda tarıfterimen qorqytty.
Danııa premer-mınıstri Mette Frederıksen bul málimdemelerdi qabyldamady jáne Grenlandııany patshalyqtyń bir bóligi ekenin atap ótti.
Buǵan deıin AQSh Memlekettik hatshysy Marko Rýbıo zań shyǵarýshylarǵa prezıdent Donald Tramptyń Grenlandııany basyp alýdy emes, satyp alýdy josparlap otyrǵanyn habarlaǵan bolatyn.
Aq úı Grenlandııany satyp alý «ulttyq qaýipsizdik basymdyǵy» ekenin jáne bul maqsatqa jetý úshin AQSh áskerı kúshterin paıdalaný qarastyrylyp jatqanyn málimdedi.
Sondaı-aq Grenlandııadaǵy jaǵdaıdy talqylaý úshin kelesi aptada Danııa sheneýnikterimen kezdesý josparlanǵany habarlandy.