AQSh Grenlandııaǵa baılanysty Eýropa elderiniń taýarlaryna baj salyǵyn engizedi

ASTANA. KAZINFORM – AQSh prezıdenti Donald Tramp Danııa, Norvegııa, Shvetsııa, Frantsııa, Germanııa, Ulybrıtanııa, Nıderlandy jáne Fınlıandııany qosa alǵanda, birqatar eýropalyq elderdiń taýarlaryna baj salyǵy engiziletinin málimdedi, dep habarlaıdy Kazinform.

Málimdemede kórsetilgendeı, 2026 jylǵy 1 aqpannan bastap AQSh-qa jetkiziletin barlyq taýarlarǵa 10% kóleminde tarıf salynady, al 2026 jylǵy 1 maýsymnan bastap bul kórsetkish 25%-ǵa deıin ulǵaıady. Tramptyń aıtýynsha, bul baj salyǵy «Grenlandııany tolyq satyp alý jóninde kelisimge qol jetkizilgenge deıin» kúshinde bolady.

— Biz kóptegen jyl boıy Danııany, Eýropalyq odaqtyń barlyq elin jáne basqalardy eshqandaı baj salyǵyn nemese ózge de ótemaqy almaı-aq sýbsıdııalap keldik. Endi ǵasyrlar ótken soń, Danııanyń qaryzyn qaıtarý ýaqyty keldi. Álemdik beıbitshilik taǵdyry tarazy basynda tur, — dedi Tramp. 

Ol óz tusynda AQSh-tyń «bul oıyndy oınaı alatynyn ári óte sátti oınaıtynyn» atap ótip, «bul qasıetti jerge eshkim qol suqpaıdy, óıtkeni másele AQSh pen búkil álemniń ulttyq qaýipsizdigine qatysty» ekenin aıtty.

Prezıdent sondaı-aq Eýropa elderiniń «belgisiz maqsattarmen Grenlandııaǵa bara bastaǵanyn», bul óz kezeginde «jahandyq qaýipsizdik úshin qaýipti jaǵdaı týyndatatynyn» alǵa tartty.

— Amerıka Qurama Shtattary biz úshin kóp táýekelge barǵan Danııamen jáne atalǵan elderdiń kez kelgenimen dereý kelissózder júrgizýge daıyn, — dep málimdedi Donald Tramp.