AQSh Grenlandııaǵa basyp kirmeıdi

ASTANA. KAZINFORM — Senator Djeıms Lankford AQSh-tyń saılanǵan prezıdenti Donald Tramptyń Grenlandııany áskerı kúshpen basyp alý qaýpin joqqa shyǵardy, dep habarlaıdy NBC News.

Oklahoma respýblıkashyly «Baspasózben kezdesýge» bergen suhbatynda Amerıka Qurama Shtattary basqa elge basyp kirmeıtinin aıtty.

Senatordyń sózinshe, Amerıka Qurama Shtattaryna Grenlandııa «ekonomıkalyq qaýipsizdik úshin» qajet.

– Ashyǵyn aıtqanda, prezıdent óte anyq aıtty. Ol amerıkalyq áskerdi soǵystan saqtaǵan prezıdent. Ol soǵys bastaýdy, amerıkalyq áskerdi keńeıtýdi kózdemeıdi, biraq Amerıkanyń ulttyq qaýipsizdigin qorǵap qalýdy qalaıdy, onyń bir bóligi - bizdiń ekonomıkalyq qaýipsizdigimiz ben bolashaǵymyz, - dedi Djeıms Lankford jeksenbide.

Djeıms Lankfordtyń málimdemesi Donald Tramp sońǵy aptalarda Grenlandııany anneksııalaýǵa qyzyǵýshylyq tanytqan sátte jasaldy.

Ótken aıda Donald Tramp: «Amerıka Qurama Shtattary Grenlandııaǵa ıelik etý jáne baqylaý búkil álemdegi ulttyq qaýipsizdik pen erkindik úshin óte mańyzdy dep sanaıdy» dep jazdy.

Florıdadaǵy baspasóz máslıhatynda saılanǵan prezıdent tipti Grenlandııa men Panama kanalyn baqylaýǵa alý úshin áskerı kúsh qoldanýǵa daıyn ekenin aıtqan.