AQSh Grenlandııa munaıyna kóz tikti
ASTANA. KAZINFORM — Greenland Energy komanııasy 2027 jyly Grenlandııanyń shyǵysynda alǵashqy munaı uńǵymasyn burǵylaýǵa ruqsat alýǵa daıyndalyp jatyr, dep habarlaıdy Kazinform agenttiginiń menshikti tilshisi FOX Business basylymyna silteme jasap.
AQSh kompanııasy brıtandyq 80 Mile kompanııasymen birlesip, Grenlandııadaǵy iri munaı ken ornyn ıgerýge kirisýi múmkin.
Grenlandııa úkimeti munaı óndirýdiń ekologııaǵa áserine alańdap, 2021 jyly munaı men gaz óndirýge jańa ruqsat berýdi toqtatty. Buǵan deıin berilgen lıtsenzııalar kúshinde, alaıda óndirý úshin úkimettiń qosymsha ruqsaty qajet.
Grenlandııanyń Kásipkerlik jáne mıneraldyq resýrstar mınıstrliginiń málimetinshe, 80 Mile kompanııasyna tıesili White Flame Energy 2015 jyly eki, al 2018 jyly Grenlandııanyń shyǵysyndaǵy Djeımson-Lend aýmaǵynda munaıdy barlaý jáne óndirý úshin úshinshi ruqsat alǵan. Al Greenland Energy kompanııasy jobaǵa ınvestor ári operator retinde qatysý úshin brıtandyq kompanııamen seriktestik ornatty.
Greenland Energy kompanııasynyń bas dırektory Robert Praıstyń aıtýynsha, táýelsiz ınjenerlik esep boıynsha, burǵylaý josparlanǵan aýmaqta 13 mlrd barrelge deıin munaı qory bolýy múmkin.
Praıstyń sózinshe, AQSh-tyń shetelden munaı jetkizýge táýeldi bolmaýy úshin saıası baılanysy jaqyn elderden jańa munaı kózderin izdeý qajet.
Al Grenlandııa úkimetiniń málimetinshe, Jameson Land jobasy áli barlaý satysynda. Qoǵam men qorshaǵan ortaǵa áserin baǵalaý qujattary maquldanǵannan keıin ǵana burǵylaýǵa kirisýge bolady.
Buǵan deıin AQSh, Danııa jáne Grenlandııa Vashıngtonnyń araldaǵy áskerı múmkindikterin edáýir arttyrýǵa jáne AQSh qarsylastarynyń onda áskerı baza salýyna jol bermeýge qatysty kelisimge kelgeni habarlanǵan bolatyn.
