AQSh, Germanııa, Ońtústik Koreıa jáne Úndistan týrısteri elimizde 4 kún bolady
ASTANA. QazAqparat – eQonaq aqparattyq júıesiniń deregine sáıkes, AQSh, Germanııa, Ońtústik Koreıa jáne Úndistannan kelgen týrıster elimizde orta eseppen 4 kún ótkizedi, dep habarlaıdy QazAqparat tilshisi Mádenıet jáne sport mınıstrliginiń baspasóz qyzmetine silteme jasap.
Elimizde saıahattaý merzimi boıynsha Ózbekstan týrısteri kósh bastap tur. Kórshi eldiń azamattary Qazaqstanda 10 kúnge deıin toqtaıdy.
Al, reseılik týrıster 6 kún, Belarýs azamattary 5 kún, Germanııa týrısteri 4 kún bolsa, Qytaı azamattary elimizde 3,5 kún ótkizedi eken.
«eQonaq júıesi – elimizge kelgen týrıster aǵynyn baqylaý jáne taldaý, ornalastyrý oryndarynyń tizilimin qurý jáne taǵy basqa birneshe mańyzdy fýnktsııany oryndaıdy. Basty maqsat – týrısterge kórsetiletin qyzmetterdiń ashyqtyǵy men sapasyn arttyrý. Júıege 3 214 ornalasý qyzmetin usynatyn kásipkerlik nysany tirkelgen», - dedi Mádenıet jáne sport mınıstrliginiń baspasóz hatshysy Móldir Ábdýalıeva.
