AQSh Gazadan kelgen azamattarǵa vıza berýdi ýaqytsha toqtatty
ASTANA. KAZINFORM – AQSh Memlekettik departamenti Gazadan kelgen adamdarǵa vıza berý rásimin ýaqytsha toqtatty. Protsedýra «tolyq ári muqııat tekseris júrgizý kezeńine» baılanysty toqtatylǵan, dep habarlaıdy DW.
Tıisti habarlama 16 tamyzda Memlekettik departamenttiń resmı X paraqshasynda jarııalandy. Vedomstvo sońǵy ýaqytta Gazadan shyqqan azamattarǵa medıtsınalyq jáne gýmanıtarlyq kórsetkishter boıynsha azdaǵan ýaqytsha vıza berilgenin atap ótti.
Reuters agenttiginiń málimetinshe, 2025 jyly AQSh Palestına ulttyq ákimshiliginiń jol júrý qujattarynyń ıelerine 3 800-den astam B1/B2 qonaq vızasyn bergen. Olar sheteldikterge AQSh-ta em qabyldaýǵa múmkindik beredi. Bıylǵy mamyr aıynda 640 vıza berilgeni belgili.
Belsendiniń málimdemesinen keıingi sheshim
Bul qadam ýltraońshyl belsendi, Tramptyń jaqtasy Lora Lýmerdiń jazbasynan keıin qabyldandy. Ol áleýmettik jelilerde tamyz aıynda AQSh-qa palestınalyq «bosqyndar» kirgenin málimdegen. Onyń sózi respýblıkashylardyń ashý-yzasyn týdyrdy. Florıda shtatynan saılanǵan kongressmen Rendı Faın bul jaǵdaıdy AQSh-tyń ulttyq qaýipsizdigine qater dep atady.
Amerıka-ıslam qatynastary keńesi Memlekettik departamenttiń sheshimin aıyptap, ony «qasaqana qatygezdik» dep baǵalady. Palestına balalaryn qorǵaý qory da bul saıasat aýyr jaraqat alǵan jáne dertke shaldyqqan balalardy emdetý múmkindiginen aıyrady dep málimdedi.
«Bul bizdiń 30 jyldan astam ýaqyt boıy atqaryp kele jatqan gýmanıtarlyq mıssııamyzǵa orny tolmas soqqy bolady», – delingen uıym habarlamasynda.
Frantsııa da mıgranttardy qabyldaýdy toqtatty
Tamyz aıynyń basynda Frantsııa SІM de Gazadan mıgranttardy qabyldaý baǵdarlamasyn toqtatty. Buǵan palestınalyq stýdenttiń áleýmettik jelide Adolf Gıtlerdiń sýretterin taratyp, evreılerdi óltirýge jáne HAMAS ustap otyrǵan tutqyndardy jazalaýǵa shaqyrǵan áreketi sebep boldy.
Frantsııa syrtqy ister mınıstri Jan-Noel Barro stýdenttiń el aýmaǵynda qalýyna jol berilmeıtinin málimdedi.
Le Monde gazetiniń dereginshe, 2023 jyldyń qazanynan beri Frantsııa 500-ge jýyq palestınalyqty qabyldaǵan, olardyń qatarynda balalar, stýdentter, jýrnalıster men óner qaıratkerleri bar.
HAMAS shabýyly jáne Izraıldiń áskerı operatsııasy
Eske sala ketsek, Taıaý Shyǵystaǵy ahýal 2023 jylǵy 7 qazanda kúrt shıelenisti. «HAMAS» qozǵalysynyń sodyrlary Izraılge jappaı shabýyl jasap, shamamen 1 200 adamdy qyryp-joıdy jáne 250-den astam adamdy tutqynǵa aldy.
Odan keıin Izraıl «HAMAS»-qa qarsy soǵys jarııalap, Gaza sektorynda áskerı operatsııa bastady.
HAMAS baqylaýyndaǵy densaýlyq saqtaý mınıstrliginiń málimetinshe, qaqtyǵys saldarynan 61 myńnan astam palestınalyq qaza taýyp, 155 myńnan astamy jaraqat aldy.
Aıta keteıik, Izraıl Gaza sektorynda gýmanıtarlyq bitim týraly deldaldardyń usynysyn qabyldamady.