AQSh Gazadaǵy atysty toqtatý kelissózderin úze turýǵa sheshim qabyldady
ASTANA. KAZINFORM — AQSh prezıdenti Donald Tramptyń arnaıy ókili Stıven Ýıtkoff beısenbide AQSh Gaza sektoryndaǵy atysty toqtatý jónindegi kelissózderdi toqtatyp, kelissóz júrgizýshiler tobyn Qatardan konsýltatsııalar úshin keri shaqyryp jatqanyn málimdedi, dep habarlaıdy Euronews.
Onyń aıtýynsha, buǵan HAMAS-tyń sońǵy jaýaby sebep bolǵan, ol «atysty toqtatýǵa qol jetkizýge degen nıettiń joq ekenin kórsetti».
— Kelisimge dáneker bolǵan taraptar barynsha kúsh saldy, alaıda HAMAS óz áreketterin úılestirmeı, shynaıy yqylaspen áreket etpeı otyr. Endi biz tutqyndardy elge qaıtarýdyń balama joldaryn qarastyramyz jáne Gaza turǵyndary úshin turaqty jaǵdaı jasaýǵa tyrysamyz, — delingen Ýıtkofftyń málimdemesinde.
Aq úı de, Memlekettik departament te ázirge túsinikteme bergen joq.
Izraıl men HAMAS arasyndaǵy atysty toqtatý týraly kelissózderde Tramp ákimshiligi birneshe aı boıy ilgerileýge qol jetkize almaı keledi, osy ýaqytta Gazadaǵy jaǵdaı nasharlaı túsken.
Resmı tulǵalar atysty toqtatqannan keıin ızraıldik áskerlerdi qaıta ornalastyrý máselesi negizgi kedergige aınalǵanyn aıtty.
Beısenbi kúni Izraıl premer-mınıstri Bınıamın Netanıahýdyń keńsesi de HAMAS-tyń jaýabyna baılanysty óz kelissóz tobynyń múshelerin Izraılge keri shaqyrtyp alǵanyn habarlady.
Kelissóz barysynda qarastyrylǵan mámile 60 kúndik atysty toqtatýdy, osy kezeńde HAMAS-tyń 10 tiri tutqyndy bosatyp, taǵy 18 adamnyń súıekterin qaıtarýyn kózdeıdi. Buǵan jaýap retinde Izraıl túrmelerdegi palestınalyq tutqyndardy bosatýy tıis.
Sondaı-aq, joba gýmanıtarlyq kómekti arttyrýdy jáne eki tarap arasynda uzaq merzimdi bitimge qol jetkizý boıynsha kelissózder júrgizýdi qamtıdy.
Kelissózder qarama-qaıshy talaptarǵa baılanysty tyǵyryqqa tireldi. HAMAS barlyq tutqyndy tek ızraıldik ásker tolyq shyǵarylyp, soǵys toqtatylǵan jaǵdaıda ǵana bosatatynyn málimdedi.
Izraıl bolsa, HAMAS bılikten bas tartyp, qarýyn tastamaıynsha, soǵysty toqtatýǵa kelispeıtinin aıtty. Palestınalyq top bul shartty qabyldamaı otyr.