AQSh Gaza sektory boıynsha jospardyń ekinshi kezeńi bastalǵanyn jarııalady
ASTANA. KAZINFORM – AQSh ákimshiligi Gaza sektoryndaǵy qaqtyǵysty aıaqtaýǵa jáne palestınalyq aýmaqta jańa basqarý modelin qalyptastyrýǵa baǵyttalǵan jospardyń ekinshi kezeńine ótkenin málimdedi. Bul týraly Kazinform menshikti tilshisi habarlaıdy.
AQSh-tyń Taıaý Shyǵys boıynsha arnaıy ókili Stıv Ýıtkoff sársenbi kúni prezıdent Donald Tramp usynǵan 20 tarmaqtan turatyn jospardyń ekinshi kezeńi iske qosylǵanyn aıtty. Atalǵan jospar Gaza sektoryndaǵy soǵysty toqtatýǵa jáne qaqtyǵystan keıingi jaǵdaıdy turaqtandyrýǵa baǵyttalǵan.
Ýıtkofftyń málimdeýinshe, ekinshi kezeń atysty toqtatý rejıminen aýmaqty demılıtarızatsııalaýǵa, tehnokratııalyq basqarý júıesin qalyptastyrýǵa jáne keń aýqymdy qalpyna keltirý jumystaryna kóshýdi kózdeıdi.
Onyń aıtýynsha, jańa kezeń aıasynda Gazada ótpeli tehnokratııalyq palestınalyq ákimshilik – Gazany basqarý jónindegi ulttyq komıtet qurylyp, tolyq demılıtarızatsııa bastalady. Bul, eń aldymen, barlyq ruqsat etilmegen qarýly toptardy qarýsyzdandyrýdy qamtıdy.
Stıv Ýıtkoff AQSh tarapynan HAMAS qozǵalysynyń qol jetkizilgen kelisimder aıasyndaǵy mindettemelerdi tolyq oryndaýy kútiletinin atap ótti. Onyń sózinshe, sonyń ishinde sońǵy qaza tapqan kepildiń súıegin dereý tapsyrý talap etiledi, al bul sharttardyń oryndalmaýy aýyr saldarǵa ákelýi múmkin.
Arnaıy ókil birinshi kezeńniń nátıjelerine de toqtaldy. Onyń aıtýynsha, bul kezeń buryn-sońdy bolmaǵan kólemde gýmanıtarlyq kómektiń jetkizilýine, atysty toqtatý rejımin saqtaýǵa, barlyq tiri kepilderdiń qaıtarylýyna jáne 28 adamnyń 27-siniń máıitin tapsyrýǵa múmkindik bergen.
Sondaı-aq ol kelisimderdi iske asyrýda deldaldyq ról atqarǵan Egıpet, Túrkııa jáne Qatar elderine alǵys bildirdi.
Buǵan deıin Reuters agenttigi ekinshi kezeń sheńberinde AQSh Gaza sektoryn HAMAS-tyń qatysýynsyz jáne halyqaralyq baqylaýmen basqaratyn ótpeli palestınalyq tehnokratııalyq organnyń qurylǵanyn jarııalaýdy josparlap otyrǵanyn habarlaǵan bolatyn. Bul kezeń sondaı-aq halyqaralyq kúshterdi ornalastyrý men qaýipsizdik tetikterin talqylaýdy qamtıdy.
Derekkózderdiń málimetinshe, komıtetti Palestına ulttyq ákimshiliginiń burynǵy vıtse-mınıstri Alı Shaat basqarýy múmkin.
Komıtetti qurýdy Palestına prezıdenti Mahmýd Abbas qoldap, palestınalyq aýmaqtardyń birligin saqtaý jáne Gaza sektory men Batys jaǵalaýdy bólýge jol bermeý qajettigin atap ótti.
Sonymen qatar negizgi palestınalyq fraktsııalar, onyń ishinde HAMAS pen «Islamdyq jıhad» qozǵalysy da tehnokratııalyq organnyń quramyna kelisim bergen. Olar Egıpettiń araǵaıyndyǵymen ótpeli ákimshiliktiń jumysyna yqpal etýge daıyn ekenderin bildirdi.
Sársenbi kúni palestınalyq fraktsııa ókilderi Kaırde konsýltatsııalar ótkizip, jospardyń ekinshi kezeńin iske asyrýdyń praktıkalyq qadamdary men Gaza sektoryn odan ári basqarý tetikterin talqylady.
Aıta keteıik, Izraıl Gaza sektoryna kezekti ret shabýyl jasady.
