AQSh Garvard-qa bólinetin 2,2 mıllıard dollar memlekettik qarjylandyrýdy toqtatady

ASTANA. KAZINFORM –  AQSh-tyń Bilim mınıstrligi Garvard ýnıversıtetine bólinetin 2,2 mıllıard dollar kólemindegi memlekettik qarjylandyrýdy toqtatatynyn málimdedi. Bul týraly BBC jazdy.

Bul sheshim ýnıversıtettiń Aq úı qoıǵan talaptardy oryndaýdan bas tartqanynan keıin qabyldandy.

Ótken aptada Aq úı Garvardqa antısemıtızmge qarsy kúreske baǵyttalǵan talaptar tizimin joldaǵan bolatyn. Bul talaptar ýnıversıtetti basqarý júıesine, kadrlyq saıasatqa jáne stýdentterdi qabyldaý tártibine ózgerister engizýdi kózdegen. Alaıda dúısenbi kúni Garvard bul talaptardy qabyldamaı, Aq úı ýnıversıtet qaýymdastyǵyn baqylaýǵa alýǵa tyrysyp jatyr dep málimdedi.

Buǵan deıin AQSh prezıdenti Donald Tramp eldegi jetekshi joǵary oqý oryndaryn Gaza sektoryndaǵy soǵysqa baılanysty narazylyqtar kezinde evreı stýdentterdi qorǵaı almady dep aıyptaǵan bolatyn. Sondaı-aq, ol stýdentter arasynda antısemıttik kózqarastardyń kúsheıýine alańdaýshylyq bildirgen.

«Sońǵy jyldary kampýstarda jıi kezdesetin oqý protsesiniń buzylýy — múldem qabyldaýǵa bolmaıtyn qubylys. Evreı stýdentterin qýdalaý — eshbir jaǵdaıda aqtalmaıdy. Elıtalyq ýnıversıtetter bul máselege baıyppen qarap, eger salyq tóleýshilerdiń qoldaýyn jalǵastyrǵysy kelse, túbegeıli ózgeristerge barýǵa mindetti», — delingen Bilim mınıstrliginiń málimdemesinde.

Mınıstrlik sonymen qatar: «Antısemıtızmge qarsy kúres jónindegi birikken jumys toby Garvard ýnıversıtetine tıesili 2,2 mıllıard dollarlyq uzaq merzimdi granttar men 60 mıllıon dollarlyq kelisimsharttardyń ýaqytsha toqtatylǵanyn jarııalaıdy», — dep habarlady.