AQSh ǵalymdary jasandy bulshyqet jasap shyǵardy - VIDEO
ASTANA. QazAqparat - Amerıkalyq ǵalymdar erekshe jipterden jáne qarmaq baýlardan myqtylyǵy joǵary jasandy bulshyqet jasap shyǵardy. Adamdardyń et denesine qaraǵanda, atalǵan bulshyqetter júz ese aýyr salmaqty kótere alady jáne júz ese kóp mehanıkalyq energııa týdyra alady.
Ónimdiligine keletin bolsaq, ol bir keli aýmaqqa 7,1 at kúshine para-par reaktıvti qozǵaltqyshpen teńese alady. Dallastaǵy Tehas ýnıversıtetiniń ǵalymdary onyń basty qupııasy tek tigin jipter men qarmaq baýlardyń qosyndysynda jatyr dep otyr. Polımerli jipti urshyqpen ıirip, bir-birine qosqan kezde, rotordy mınýtyna 10 myń ret aınaldyra alatyn myqty bulshyqet paıda bolady.
Bulshyq et temperatýranyń aýytqýy kezinde jıyrylyp, sýyǵanda qaıta ornyna keledi. Mysaly, adamnyń tabıǵı bulshyqetteri tek 20 paıyzǵa ǵana jıyrylatyn bolsa, jasandy bulshyqetter 50 paıyzǵa deıin jıyryla alady. Sonymen qatar olar berik bolyp keledi. Birneshe mıllıon ret aýyrtpalyq túsirilse de, jasandy talshyqtardyń ónimdiligi kemimeıdi.
«Keleshekte bul polımerli bulshyqetterdiń qoldanylý aıasy kóp bolatynyna senimdimiz. Olar «aqyldy» protezderde, ekzoqańqalarda, robottardyń aıaq-qoldaryn jasaýǵa jáne ózge de mehanıkalyq qural-jabdyqtarda paıdalanýy múmkin», - deıdi Dallastaǵy Tehas ýnıversıtetiniń janyndaǵy Nanotehnologııalar ınstıtýtynyń doktory Reı Boman.
