AQSh ǵalymdary temekini tastaýdyń tıimdi tásilin anyqtady
ASTANA. KAZINFORM — AQSh-ta ókpe obyryna tekserilgen naýqastarǵa 600 dollarǵa deıin aqshalaı syıaqy usyný temekini tastaǵandar úlesin eki esege jýyq arttyrǵan. Mundaı nátıje randomızatsııalanǵan klınıkalyq zertteý barysynda anyqtaldy, dep jazady Pensılvanııa ýnıversıteti.
JAMA jýrnalynda jarııalanǵan zertteýge Penn Medicine, Geisinger, Henry Ford Health jáne Kaiser Permanente Southern California medıtsınalyq ortalyqtarynda ókpeni tómen dozaly kompıýterlik tomografııadan ótkizýge jiberilgen 3 200-den astam temeki shegýshi qatysty.
Olardyń basym bóligi tabysy tómen adamdar, aýyl turǵyndary, afroamerıkalyqtar men latynamerıkalyqtar boldy. Bul toptar sapaly medıtsınalyq kómek alýda túrli qıyndyqtarǵa jıi tap bolady.
Ǵalymdar temekini tastaýǵa kómektesetin 4 tásildi salystyrdy. Birinshi topqa ádettegi medıtsınalyq kómek kórsetilip, temekiden bas tartý jóninde keńes berilip, mamandarǵa joldama usynyldy. Ekinshi top standartty kómekten bólek, temekini tastaýǵa arnalǵan dárilerdi tegin aldy. Úshinshi topqa dári-dármekpen birge aqshalaı syıaqy berildi. Al tórtinshi topqa dári-dármek pen aqshalaı syıaqydan bólek, temekisiz bolashaq ómirdi elestetýge kómektesetin FutureMe mátindik baǵdarlamasy usynyldy.
Zertteý bastalǵannan keıin 6 aı ótkende standartty kómek alǵandardyń 4,3%-y, al dári-dármekti tegin paıdalanǵandardyń 5,1%-y temekini tastaǵan. Dári-dármekpen birge aqshalaı syıaqy usynylǵan topta bul kórsetkish 8,8%-ǵa jetti. Al dári-dármek, syıaqy jáne FutureMe baǵdarlamasyn qatar paıdalanǵan tórtinshi topta qatysýshylardyń 7,2%-y temekiden bas tartqan.
Qatysýshylarǵa beriletin syıaqynyń eń joǵary mólsheri 600 dollar boldy. Olar temekini tastaǵanyn rastaǵan jaǵdaıda eki aptadan keıin 100 dollar, úsh aıdan soń 200 dollar jáne 6 aı ótkende 300 dollar ala aldy. Ár tólemniń berilýi qan nemese zár taldaýynyń nátıjesine baılanysty boldy. Taldaýlar adamnyń temeki shegýdi toqtatqanyn rastaýǵa tıis edi.
Pensılvanııa ýnıversıtetiniń pallıatıvtik kómek jáne aýyr aýrýlardy zertteý ortalyǵynyń (PAIR) dırektory, zertteýdiń jetekshi avtory Skott Halpern aqshalaı syıaqynyń nátıjesine toqtaldy.
— Bul adamdar ondaǵan jyl boıy temeki shekken jáne ony tastaýǵa buryn da birneshe ret áreket jasap, nátıje shyǵara almaǵan bolýy múmkin. Biz aqshalaı syıaqy dástúrli tásildermen kómek kórsetý qıynǵa soǵatyn toptaǵy temekini tastaǵan adamdardyń úlesin arttyratynyn anyqtadyq, — dedi ol.
Aıta keteıik, Ispanııa temeki shegýge qatysty talaptardy kúsheıtpek.
