AQSh ǵalymdary kofeniń qartaıýdy baıaýlatýǵa yqtımal paıdasyn túsindirdi
ASTANA. KAZINFORM — AQSh-taǵy Texas A&M University ǵalymdary kofe quramyndaǵy keıbir zattar jasýshalardy qabyný men zaqymdanýdan qorǵaıtyn tabıǵı mehanızmdi iske qosýy múmkin degen qorytyndyǵa keldi.
Zertteý nátıjeleri Nutrients ǵylymı jýrnalynda jarııalandy. Ǵalymdar kofe quramyndaǵy keıbir qosylystardyń NR4A1 retseptorymen ózara árekettesetinin anyqtady. Bul aqýyz jasýshalyq kúızelisti, qabyný úderisterin, zat almasýdy jáne tinderdiń qalpyna kelýin retteýge qatysady.
Zerthana jaǵdaıynda júrgizilgen tájirıbelerde kofe quramyndaǵy keıbir zattar jasýshalardyń zaqymdanýyn azaıtyp, qaterli isik jasýshalarynyń kóbeıýin baıaýlatqan. Al zertteýshiler NR4A1 aqýyzyn alyp tastaǵanda, bul áser baıqalmaǵan. Bul kofeniń qorǵanys áseri dál osy aqýyz arqyly iske qosylýy múmkin ekenin kórsetedi.
Ǵalymdardyń aıtýynsha, jasýshalarǵa eń kúshti áser etken zattar – kofe dánderinde kezdesetin polıfenoldar. Solardyń biri – kofe qyshqyly. Al kofeınniń de NR4A1 aqýyzymen baılanysatyny anyqtalǵanymen, onyń áseri áldeqaıda álsiz bolǵan.
Zertteý avtorlarynyń biri Stıven Seıftiń aıtýynsha, kofeniń burynnan belgili paıdaly qasıetteriniń bir bóligi onyń aǵzany kúızelisten týyndaıtyn zaqymdanýdan qorǵaıtyn aqýyzǵa áser etýimen baılanysty bolýy múmkin.
Sonymen qatar ǵalymdar bul nátıjelerge asyǵys qorytyndy jasamaýǵa shaqyrady. Zertteý adamdardyń qatysýymen emes, tek zerthanalyq jasýshalarda júrgizilgen. Sondyqtan ol kofe ishý qaterli isik nemese basqa aýrýlardyń aldyn alady degendi dáleldemeıdi. Bul mehanızmniń adam aǵzasynda dál osylaı jumys isteıtinin anyqtaý úshin qosymsha zertteýler qajet.
Aıta ketelik ǵalymdar kofeniń qaldyǵyn 90 sekýndta otynǵa aınaldyryp jatyr.
