AQSh Frantsııanyń Palestınany memleket retinde taný bastamasyn qoldamady

ASTANA. KAZINFORM – Amerıka Qurama Shtattary Frantsııanyń Palestınany memleket retinde taný týraly sheshimin qoldamady. Bul týraly AQSh memlekettik hatshysy Marko Rýbıo málim etti, dep habarlaıdy TASS.

«AQSh BUU Bas Assambleıasynda palestınalyq memleketti taný jónindegi Frantsııa prezıdenti Emmanýel Makronnyń josparyn úzildi-kesildi qabyldamaıdy», – dep jazdy ol X áleýmettik jelisinde.

Marko Rýbıo bul qadamdy «esepsiz sheshim» dep atap, onyń «HAMAS uıymynyń múddesine qyzmet etetinin» jáne «2023 jylǵy 7 qazandaǵy oqıǵalardyń qurbandaryna jasalǵan soqqy» ekenin aıtty.

Buǵan deıin Frantsııa prezıdenti Emmanýel Makron Parıjdiń Palestınany memleket retinde tanýǵa daıyn ekenin málimdegen bolatyn. Resmı málimdeme BUU Bas Assambleıasynyń qyrkúıekte ótetin jańa sessııasynda jasalýy múmkin.

Makronnyń aıtýynsha, qazirgi basty maqsat – Gazadaǵy soǵysty dereý toqtatý jáne beıbit turǵyndarǵa gýmanıtarlyq kómek kórsetý. Sondaı-aq ol HAMAS qozǵalysyn qarýsyzdandyrýdy, Gazany qalpyna keltirý men aımaqtaǵy qaýipsizdikti qamtamasyz etýdi qoldaıtynyn jetkizdi.

Frantsııa basshysy Palestına memleketiniń ómirsheńdigin qamtamasyz etý úshin onyń qarýsyzdanýyn jáne Izraıldi tolyq moıyndaýyn mańyzdy dep esepteıdi. Onyń pikirinshe, bul Taıaý Shyǵys halyqtarynyń qaýipsizdigine úles qosýǵa múmkindik beredi.