Qazaqstanda túsirilgen qusbegilik týraly fotosýretter halyqaralyq syılyqty ıelendi
ASTANA. KAZINFORM – AQSh fotografy Qazaqstandaǵy qusbegilik týraly túsirgen fotosýretteri úshin halyqaralyq marapatqa ıe boldy. Bul týraly Kazakh Tourism ulttyq kompanııasy habarlaıdy.
Bıyl AQSh fotografy Karolına Voshtasık Qazaqstanda alǵash ret bolyp, búrkitshilik dástúri boıynsha túsirilim ótkizdi. Onyń qazaq halqynyń kóne ónerine arnalǵan jumystary «Communication Arts Awards of Excellence» halyqaralyq syılyǵyn ıelendi. Atalǵan marapat derekti fotosýret salasyndaǵy jetistikter úshin berildi.
– Qusbegilik boıynsha túsirilimder Almaty oblysynyń Kúrti aýylynda jáne Іle Alataýynyń baýraıynda ótti. Álem chempıony atanǵan búrkitshiler, qyrandy baptaýǵa óz ómirin arnaǵan mamandar sheteldik fotografqa qazaq halqynyń dástúrlerin pash etti. Karolına Voshtasık adam men qus arasyndaǵy erekshe baılanys sátterin sýretke túsirdi. Óz jumystary arqyly ol tek estetıkany ǵana emes, sonymen birge ǵasyrlardan kele jatqan ónerdiń tereń maǵynasyn da jetkizedi, - delingen habarlamada.
Aqparatta aıtylǵandaı, halyqaralyq baıqaýǵa usynylǵan fotograftyń sýretter serııasy álemdik aýdıtorııanyń Qazaqstannyń mádenıetine qyzyǵýshylyǵyn oıatty.
Foto túsirilimge qazaq mádenıetin halyqaralyq deńgeıde belsendi túrde dáriptep júrgen týrızm salasynyń medıa-elshisi jáne prodıýser Nadıra Ahonova uıytqy bolǵan.
Ulttyq kompanııanyń aqparatynsha, Karolına Voshtasık – fotografııa álemindegi bedeldi «Lucie Award» syılyǵynyń ıegeri. Bul marapat «fotografııa ındýstrııanyń Oskary» dep atalady.