AQSh Federaldyq rezerv júıesiniń burynǵy basshysy Alan Grınspen 100 jasynda ómirden ótti
ASTANA. KAZINFORM — Alan Grınspen 100 jasynda dúnıeden ótti. AQSh-tyń aqsha-nesıe saıasatyn birneshe prezıdent tusynda aıqyndaǵan bedeldi ekonomıst týraly Kazinform agenttiginiń Vashıngtondaǵy menshikti tilshisi NBC News-ke silteme jasap habarlady.
AQSh-tyń Federaldyq rezerv júıesin 1987–2006 jyldary basqarǵan Alan Grınspen Parkınson aýrýynyń asqynýynan kóz jumdy.
Ol amerıkalyq ekonomıkany basqarýda mańyzdy ról atqardy. Atap aıtqanda, 1987 jylǵy «qara dúısenbi» qarjy daǵdarysynyń saldaryn eńserýge jáne 1991–2001 jyldar aralyǵyndaǵy AQSh tarıhyndaǵy eń uzaq ekonomıkalyq ósim kezeńin saqtaýǵa yqpal etti.
Alan Grınspen 1926 jyly 6 naýryzda Nıý-Iork qalasynyń Vashıngton-Haıts aýdanynda dúnıege kelgen. Ekonomıkalyq bilim alyp, keıin AQSh-tyń birneshe prezıdentine keńesshi bolǵan.
1967 jyly ol Rıchard Nıksonnyń keńesshisi boldy. Al 1974 jyly Djerald Ford ákimshiligi janyndaǵy Ekonomıkalyq keńesshiler keńesiniń tóraǵasy qyzmetine taǵaıyndalyp, 1977 jylǵa deıin jumys istedi.
1987 jyly Ronald Reıgan ony Federaldyq rezerv júıesiniń tóraǵalyǵyna usyndy.
Grınspen FRJ tarıhynda eń uzaq qyzmet atqarǵan basshylardyń biri sanalady. Bul kórsetkish boıynsha ol tek 1951–1970 jyldary júıeni basqarǵan Ýılıam Makchesnıden keıin tur.
Eńbegi úshin Alan Grınspen birqatar halyqaralyq jáne memlekettik marapatqa ıe boldy. 2000 jyly Frantsııa úkimeti ony Qurmet legıony ordenimen marapattady. 2002 jyly Elızabet II oǵan Brıtan ımperııasynyń qurmetti rytsary ataǵyn berdi.
Al 2005 jyly George W. Bush Grınspenge AQSh-tyń eń joǵary azamattyq marapaty — Prezıdenttiń Bostandyq medalin tabystady.
Osyǵan deıin AQSh-tyń Federaldyq qor júıesi paıyzdyq mólsherlemeni ózgerissiz qaldyrǵany týraly jazdyq.
