AQSh Federaldyq rezerv júıesi paıyzdyq mólsherlemeni ózgertpedi
ASTANA. KAZINFORM — AQSh-tyń Federaldyq rezerv júıesi paıyzdyq mólsherlemeni burynǵy deńgeıde saqtaý týraly sheshim qabyldady, dep habarlaıdy Kazinform agenttiginiń menshikti tilshisi NBC News basylymyna silteme jasap.
Tamyz aıynda jyldyq ınflıatsııa 3,4 paıyz bolsa, qyrkúıekte 3,7 paıyzǵa deıin ósti. Soǵan qaramastan, paıyzdyq mólsherlemeni burynǵy deńgeıde saqtaý týraly sheshim qabyldandy. AQSh-ta ınflıatsııanyń ósýine benzın, dızel otyny men shıki munaı baǵasynyń kúrt ósýi negizgi sebep bolyp otyr. Bul tutynýshylarǵa aıtarlyqtaı salmaq saldy.
FRJ ınflıatsııa deńgeıi áli de nysanaly 2 paıyzdyq kórsetkishten edáýir joǵary ekenin málimdedi. Bul jeltoqsanda ótetin aqsha-kredıt saıasaty jónindegi otyrysta paıyzdyq mólsherlemeni kóterý múmkindigin qarastyrýǵa negiz boldy.
AQSh Federaldyq rezerv júıesiniń tóraǵasy Kevın Ýorsh kelesi jyly paıyzdyq mólsherlemege qatysty sheshim qabyldanatyn otyrystar sany segizden jetige deıin qysqaratynyn aıtty. Al 2028 jyly mundaı otyrystar sany taǵy ekige azaıady.
Paıyzdyq mólsherlemeniń kóterilýi onsyz da qarjylyq qıyndyqtarǵa tap bolǵan tutynýshylarǵa qosymsha salmaq túsirýi múmkin edi.
NBC News júrgizgen sońǵy saýalnamaǵa sáıkes, Donald Tramptyń eldegi ómir súrý qunyna qatysty saıasatyn maquldaǵandar 27 paıyz bolsa, Irandaǵy soǵysqa qatysty áreketterin qoldaǵandar 29 paıyz bolǵan.
Saýalnamaǵa qatysqan amerıkalyqtardyń úshten ekisi Tramptyń Iranmen soǵysyna baılanysty benzın baǵasynyń kúrt ósýin «óte kúrdeli» nemese «edáýir mańyzdy» másele dep sanaıdy. Al jartysynan astamy qazirgi ekonomıkalyq jaǵdaı satyp alý múmkindigin shektep otyrǵanyn jetkizgen.
Eske sala keteıik, buǵan deıin AQSh Federaldyq rezerv júıesi mólsherlemeni 4%-ǵa kótergenin habarlaǵan edik.
