AQSh Federaldyq rezerv júıesi mólsherlemeni 4%-ǵa kóterdi
ASTANA. KAZINFORM — AQSh Federaldy rezerv júıesi paıyzdyq mólsherlemeni 0,25 paıyz kóterip, 3,75-4% deńgeıine jetkizdi. Mólsherleme 2023 jyldan beri alǵash ret kóterilip otyr, dep habarlaıdy Kazinform agenttigi BBC-ge silteme jasap.
FRJ tóraǵasy Kevın Ýorsh ınflıatsııa deńgeıiniń joǵary bolýy mólsherlemeniń kóterilýine sebep bolǵanyn aıtty. Onyń sózinshe, ınflıatsııa kóp ýaqyt boıy mejeden joǵary deńgeıde qalyp otyr. Soǵan qaramastan, retteýshi organ basshylyǵy AQSh ekonomıkasynyń aldaǵy kezeńde turaqty damıtynyna senim bildirdi.
AQSh prezıdenti Donald Tramp paıyzdyq mólsherlemeni tómendetýdi qoldaıtynyn aıtty. Onyń pikirinshe, AQSh-tyń qaryzdaryn óteý qabileti senimdi bolǵandyqtan, paıyzdyq mólsherleme 1% nemese odan tómen bolýy kerek.
Ortalyq bankter ınflıatsııany tejeý úshin paıyzdyq mólsherlemeni kóterýdi negizgi qural retinde qoldanady. Mólsherleme óskende nesıe qymbattap, halyqtyń tutyný shyǵyny men ınvestıtsııa kólemi azaıýy múmkin. Bul óz kezeginde baǵanyń ósý qarqynyn báseńdetýge yqpal etedi.
Baǵanyń ózgerýine energııa resýrstary qunynyń ósýi de áser etedi. BBC málimetinshe, AQSh, Izraıl jáne Iran arasyndaǵy qaqtyǵystan álemdik munaı baǵasy kúrt ósip, sonyń saldarynan avtokólik otyny men basqa da taýarlar men qyzmetterdiń quny artqan.
Qarashada ótetin AQSh Kongress saılaýynda halyqtyń kúndelikti shyǵyndary da ózekti máselege aınalyp otyr.
Buǵan deıin AQSh Federaldyq rezerv júıesi shildedegi otyrystyń qorytyndysy boıynsha federaldy qorlar mólsherlemesiniń nysanaly dıapazonyn 3,5–3,75% deńgeıinde saqtap qalǵan edi.
Sondaı-aq AQSh-tyń bazalyq mólsherlemesi álem ekonomıkasyna qalaı áser etetini jóninde jazǵanbyz.
Aqzat Jıenalına
