AQSh Federaldyq qor júıesi paıyzdyq mólsherlemelerdi ózgerissiz qaldyrdy
ASTANA. KAZINFORM – AQSh Federaldyq qor júıesiniń músheleri paıyzdyq mólsherlemelerdi jyldyq 3,5%-3,75% dıapazonynda saqtap qalý úshin daýys berdi, dep habarlaıdy NBC News.
Retteýshi mólsherlemeni osy deńgeıde úshinshi ret qatarynan saqtap otyr.
- Sońǵy kórsetkishter ekonomıkalyq belsendiliktiń turaqty qarqynmen ósip kele jatqanyn kýálandyryp otyr. Jumyspen qamtý ósimi ortasha eseppen tómen bolyp qalyp otyr, al jumyssyzdyq deńgeıi sońǵy aılarda is júzinde ózgerissiz qaldy. Inflıatsııa joǵary deńgeıde, bul jýyrda bolǵan álemdik energııa tasymaldaýshylar baǵasynyń ósiminiń kórinisi deýge bolady, - delingen málimdemede.
Tek Donald Tramp jaqynda ǵana taǵaıyndaǵan Stıven Mıran ǵana mólsherlemeni shırek pýnktke shegerýdi qoldady.
Bul Djerom Paýeldiń álemdegi eń qýatty ortalyq banktiń tóraǵasy retinde sońǵy kezdesýi bolýy múmkin.
Senattyń bank komıteti FQJ tóraǵasy laýazymyna Tramptyń Paýeldiń ornyna usynǵan Kevın Ýorshty bekitý úshin daýys berdi.
Paýell 15 mamyrda ókilettik merzimi aıaqtalǵannan keıin FQJ tóraǵasy qyzmetinen ketetin bolsa da, ol Ádilet mınıstrliginiń oǵan jáne ortalyq bankke qatysty tergeýi «tolyq aıaqtalǵansha» Basqarýshylar keńesiniń múshesi bolyp qala beretinin málimdedi.
Eske salsaq, qańtar aıynda Tramp Detroıt ekonomıkalyq klýbynda sóılegen sózinde AQSh tarıhyndaǵy eń kúshti jáne eń jyldam ekonomıkalyq órleý týraly jarııalady.
