AQSh Eýroodaq azamattarynyń bıometrııalyq derekterine qol jetkizýdi talap etti
ASTANA. KAZINFORM — AQSh Eýroodaq elderine shekara qaýipsizdigi boıynsha seriktestiktiń keńeıtilgen baǵdarlamasy aıasynda polıtsııa bazasyndaǵy bıometrııalyq derektermen almasýdy usyndy. Bul elge vızasyz kirý sharttarymen baılanysty, dep habarlaıdy DW.
Bul bastama AQSh-qa 90 kúnge deıin vızasyz kirý baǵdarlamasyna qatysý sharttaryna qatysty bolmaq.
AQSh vızasyz rejımge qoljetimdilikti jańa qaýipsizdik talaptarymen baılanystyrdy. Eger kelisim 2026 jylǵy 31 jeltoqsanǵa deıin jasalmasa, Eýroodaq elderi shekteýlerge tap bolýy múmkin.
Eýropalyq komıssııa belgilengen merzimdi rastady. Alaıda bul usynys EO ishinde daý týdyrdy. Eýroparlament depýtaty Rakıel Garsııa Ermıda-van der Valle jaǵdaıdyń Eýroodaqqa qysym kórsetý ekenin aıtyp, kelissózderdi toqtatýǵa shaqyrdy.
Qazirgi ýaqytta polıtsııa derekter bazasynan, sonyń ishinde saýsaq izderi jáne bet keskinderimen bólisýge qatysty talqylaýlar júrip jatyr. Mundaı derekqorlarda tek sottalǵan qylmyskerler týraly ǵana emes, sonymen qatar kúdiktiler týraly da aqparat bar, bul qosymsha alańdaýshylyq týdyrady.
Jýrnalıst jáne quqyq qorǵaýshy Mattıas Monroıdyń aıtýynsha, bul tájirıbe qarapaıym azamattarǵa da áser etýi múmkin, óıtkeni derekqorǵa kirý mindetti túrde kináni moıyndaýdy bildirmeıdi.
Sarapshylar derekter almasýdyń teńsizdigin atap ótti. AQSh-ta Eýropalyq derekter bazasymen salystyrýǵa bolatyn biryńǵaı ortalyqtandyrylǵan júıe joq.
Eýroodaqta bul bastamaǵa qatysty talqylaýlar jalǵasyp, onyń EO azamattary úshin quqyqtyq jáne saıası saldary baǵalanyp jatyr.
Aıta keteıik, byltyr Eýropalyq Odaqtaǵy mıgranttar sany rekordtyq deńgeıge jetti.
