AQSh esirtki karteliniń jańa basshysy týraly aqparat úshin iri syıaqy belgiledi
ASTANA. KAZINFORM — AQSh úkimeti Meksıkadaǵy eń yqpaldy esirtki karteliniń jańa jetekshisi sanalǵan, AQSh azamaty Hýan Karlos Gonsalesti, laqap aty «Pelondy», ustaýǵa kómektesetin aqparat úshin 25 mln dollar kóleminde syıaqy usyndy. Bul týraly Kazinform agenttiginiń Vashıngtondaǵy menshikti tilshisi NBC News-ke silteme jasap habarlady.
Syıaqy kólemi burynǵy 5 mln dollardan 25 mln dollarǵa deıin ulǵaıtyldy. Sonymen qatar Donald Tramp ákimshiligi «Halıskonyń jańa býyn karteli» (Cartel de Jalisco Nueva Generación, CJNG) jetekshileri týraly aqparat úshin jalpy somasy 100 mln dollar kóleminde syıaqy jarııalap, kartel músheleriniń týystary men iskerlik seriktesterine AQSh vızalaryn berýge shekteý engizdi.
CJNG AQSh sheteldik terrorıstik uıym dep tanyǵan Meksıkanyń segiz esirtki karteliniń qataryna kiredi.
Bıyl aqpanda kartel jetekshisi Nemesıo Rýben Osegera Servantes, laqap aty «El Mencho», Meksıka áskerı kúshteriniń operatsııasy kezinde qaza tapqan bolatyn. Bul operatsııaǵa AQSh barlaý qyzmeti aqparattyq qoldaý kórsetken. Operatsııadan keıin Halısko shtatynda zorlyq-zombylyq kúsheıgen.
Habarlanǵandaı, Osegera Servantestiń ógeı uly ári AQSh pen Meksıkanyń qos azamaty Hýan Karlos Gonsales karteldiń basqarýyn óz qolyna alǵan. Uıym esirtki óndirisi men kontrabandasynan bólek, avokado óndirisi sııaqty zańdy bıznes salalarynda da qyzmet etedi.
CJNG Meksıkadaǵy eń iri esirtki karteli sanalady. Ol eldiń 32 shtatynyń 21-inde áreket etedi, sondaı-aq onyń qyzmeti AQSh-ty qosa alǵanda birneshe memleketke taralǵan.
Donald Tramp ákimshiligi Meksıka prezıdentiniń úkimetine esirtki kartelderine qarsy kúresti kúsheıtý jóninde qysymdy arttyryp otyr. Aq úı bul qylmystyq toptarǵa qarsy áskerı sharalar qoldaný múmkindigin de joqqa shyǵarmaıdy.
Buǵan deıin Tramp Latyn Amerıkasynyń esirtki kartelderine qarsy áskerı odaq quratynyn jarııalaǵan bolatyn.
