AQSh Energomıni: Sáýir-maýsym aralyǵynda Brent munaıy 23 dollar bolady
Bul rette munaı tutyný kólemi táýligine 10,1 mln barrelge nemese 10 paıyzǵa qysqaryp, sonyń nátıjesinde Ekonomıkalyq yntymaqtastyq jáne damý uıymy elderindegi munaıdyń kommertsııalyq qory 7 paıyzǵa artty jáne 2017 jyldyń maýsymynan beri alǵash ret 3 mlrd barrel sheginen asyp tústi.
Al AQSh Energetıka mınıstrliginiń baǵalaýyna sáıkes, álemdegi munaı tutyný kóleminiń quldyraý shegi sáýir aıynda táýligine 16,7 mln barrelge jetip, ondan keıin birtindep qalpyna keledi. 2020 jyldyń qorytyndysynda suranystyń quldyraýy táýligine 5,25 mln barrel bolady. Buǵan qosa, jyl boıy óndiris kólemi táýligine 1,2-1,4 mln barrel sheginde qysqara túsedi. Osyǵan baılanysty 2020 jyldyń kóktem jáne kúz aılarynda álemdegi munaıdyń kommertsııalyq qory tarıhı maksımýmyna shamamen 3,4 mlrd barrelge jetedi.
Osyndaı ahýaldyń aıasynda AQSh Energetıka mınıstrligi osy jyldyń sáýir-maýsym aılarynda Brent markaly munaıdyń ortasha aılyq quny 23 dollarǵa deıin quldyraıtyndyǵyn kútedi. Degenmen, sodan keıin munaı baǵasy 2020 jyldyń jeltoqsanyna deıin birtindep qalpyna kelip, barreline 35 dollarǵa jetpek. Al 2021 jyly Brent baǵasy barreline 48 dollarǵa deıin ósýi múmkin.
AQSh Energetıka mınıstrliginiń boljamdy baǵalaýynan shyǵatyn birqatar qorytyndy mynadaı:
1. Taıaý eki jyldyń ishinde munaı baǵasy barreline 50 dollardan asady deýge eshqandaı negiz joq.
2. Bul boljamda OPEK+ pen G20 elderiniń munaı óndirý kólemin táýligine 10 mln barrelge deıin qysqartý týraly kelisimge kelý múmkindigi eskerilmegen sııaqty. Álem elderi mundaı kelisimge kelgen jaǵdaıda ol sáýirdegi álemdegi munaı profıtsıtin táýligine 16 mln barrelden 5-6 mln barrelge deıin tómendete alady. Nátıjesinde kóktemde jáne jazda munaıdyń ortasha aılyq baǵasy 23 dollardan joǵarylap, 34-40 dollarǵa jetip qalýy múmkin.
3. Eń nashar nusqanyń ózinde Brent baǵasy ortasha eseppen alǵanda barreline 23 dollardan tómen bolmaıdy. Bul tipti munaı eksporttaýshy elder shıkizatty óndirý kólemin qysqartýǵa kelise almasa da USD/KZT baǵamynyń boljamy 448-450 teńge deńgeıinde shekteledi degendi bildiredi.
