AQSh endi ǵylym men tehnologııa salasynda kóshbasshy emes - zertteý

NUR-SULTAN. QazAqparat - AQSh buryn ǵylym men tehnologııa salasynda álemdik kóshbasshy bolǵan edi. Jańa zertteý nátıjeleri Amerıka reıtınginiń túsip ketkenin kórsetti, dep jazady QazAqparat CNN-ge silteme jasap.

«AQSh-tyń «Ǵylym jáne tehnıka 2020» baıandamasy osy aptada jaryq kórdi. Zertteýdi Ulttyq ǵylymı keńes pen ulttyq ǵylym qory jasady. Baıandama eki jylda bir ret jaryq kóredi jáne Kongreske usynylady», dep jazady agenttik.

Jýrnalısterdiń jazýyna qaraǵanda, Ulttyq ǵylym keńesiniń tóraıymy Dıana Sýveın ǵylym men tehnıka búkil álemde keń tarap jatqanymen, AQSh bul salalarda kóshbasshylyqty ýysynan shyǵaryp alǵanyn málimdegen.

«Ǵylym men tehnıka AQSh ekonomıkasy men ulttyq qaýipsizdikke tyǵyz baılanysty. Amerıka 2017 jyly osy saladaǵy zertteýlerge 548 mlrd dollar jumsap, aldyńǵy orynda turǵan edi. AQSh-ta ǵylym men tehnıka zertteýlerine ınvestıtsııany negizinen bıznes quıady, al federaldy úkimet bul salalardy qarjylandyrýdy 2000 jyly azaıtty», dep jazady agenttik.

Jýrnalıstiń aıtýynsha, úkimet 2017 jyly zertteýlergi 38% nemese 76 mlrd dollar salsa, bıznes 43 % nemese 85 mlrd dollar quıǵan. Federaldy qarjylandyrýdyń azaıýy joǵary bilim salasyn zertteýdiń azaıýyna alyp kelgen.

«Baıandamada aıtylǵandaı, AQSh-tyń ǵylym men tehnologııa salasyndaǵy jahandyq úlesi 25 paıyzǵa deıin azaıǵan. Al Azııa elderiniń úlesi kerisinshe, artqan», dep jazady avtor.

Onyń aıtýynsha, jahandyq zertteýler ósiminiń úshten biri Qytaıǵa tıesili.