AQSh Elshisi: Taý-ken salasyn jekeshelendirý ınvestor tartýǵa jol ashar edi
ASTANA. KAZINFORM – AQSh-tyń Qazaqstandaǵy Tótenshe jáne Ókiletti Elshisi Denıel Rozenblıým taý-ken salasyna ınvestıtsııany nyǵaıtý máselesine arnalǵan forýmda amerıkalyq ınvestorlardyń talap-tilekterin jetkizdi.
«Men Arızona shtatynda boldym. Bul AQSh-taǵy taý-ken óndirisi damyǵan óńirlerdiń biri. Sol kezde ondaǵy birqatar kompanııalardan Qazaqstannyń taý-ken sektoryna qyzyǵýshylyq tanytqanyn estidim. Biraq bul jerde másele óte kóp. Men olarǵa mynany aıttym. Qazaqstanda mıneraldy resýrstardyń tamasha qory bar ekenin jetkizdim. Ol resýrstar jasyl ekonomıkaǵa kóshýde taptyrmas tranzıt bola alady. Qazaqstan tsıfrlandyrýda da alǵa jyljyp kele jatqanyn aıttym. Osynyń bári ınvestorlardy Qazaqstanǵa tartady», - dep bastady sózin dıplomat.
Sondaı-aq, ol salaǵa engizilip jatqan ashyqtyq qaǵıdaty jalǵasa berý kerek degen paıymyn jetkizdi.
«Qazaqstannyń ekonomıkalyq ósimine senetin dosy retinde taý-ken salasyndaǵy áleýetterińizdi qalaı barynsha ashýǵa bolatynyn aıtqym keledi.
Birinshi kezekte, ashyqtyq qamtamasyz etilýi kerek. Investorlar boljap bilýge bolatyn saıasatty, ashyqtyqty, sheshim qabyldaý, zań bekitý, salyq salý protsesteriniń kórineý júrgenin jaqsy kóredi. Jeke sektordaǵy áriptesterimizden zańdardyń bárine birdeı adal qoldanylǵanyn, barynsha ashyqtyq bolǵanyn qalaıtynyn jıi estımiz. Bul óte mańyzdy. AQSh ınvestorlary ádil naryq kórgisi keledi, sottardyń zańgerlik otyrystarynan, tórelikterden qorǵalǵanyn sezingisi keledi.
AQSh ınvestorlary taý-ken isinde jeke sektordyń kóbirek bolǵanyn, jeke menshiktiń basym úles alǵanyn qalaıdy. Bul salada ınnovatsııalardyń etek jaıyp, kreatıvti sheshimder paıda bolýyna jaǵdaı týǵyzady.
Sondaı-aq, aktsıonerler men menedjerlerden eseptilik talap etip, tıimdilikti arttyrý óte mańyzdy. Úkimet bul baǵytta, saladaǵy óziniń úlesin azaıtýǵa naqty qadamdar jasap otyr. Taý-ken sektorynda jekeshelendirý kóp bolsa, salanyń tartymdylyǵy arta túser edi. Biz Qazaqstannyń sektorǵa halyqaralyq ınvestıtsııa tartý baǵytyndaǵy qazirgi baǵdaryna oń kózben qaraımyz», - dedi Denıel Rozenblıým.
