AQSh elshisi Makronǵa jazǵan haty úshin Frantsııanyń Syrtqy ister mınıstrligine shaqyryldy

ASTANA. KAZINFORM – AQSh elshisi Charlz Kýshner Frantsııa prezıdenti Emmanıýel Makronǵa hat jazǵany úshin Syrtqy ister mınıstrligine shqyryldy. Hatta elshi elde órship turǵan antısemıtızmge qarsy kúres sharalarynyń jetkilikti deńgeıde tıimdi bolmaı otyrǵandyǵyn aıtqan, dep habarlaıdy BBC. 

Dıplomat Frantsııaǵa zııanyn tıgizip otyrǵan antısemıtızm týraly mysaldar keltirdi.

Ol sonymen qatar máseleni sheshý úshin Makronmen jáne basqa frantsýz kóshbasshylarymen «baıypty jospar ázirleýge» daıyn ekenin málimdedi.

Frantsııa SІM elshiniń sózin qabyldaýǵa bolmaıdy dep otyr. Sondyqtan vedomstvo dúısenbi, 25 tamyzda Amerıka elshisin shaqyryp, onyń málimdemeleri elshilerdiń memleketterdiń ishki isterine aralasýyna ruqsat bermeıtin 1961 jylǵy Vena konventsııasyna qaıshy keledi dep málimdedi.

Kýshnerdiń haty ótken aptada Makronǵa hat jazǵan Izraıl premer-mınıstri Bınıamın Netanıahýdyń málimdemelerimen úndesip otyr. Onda ol frantsýz kóshbasshysyn Palestına memleketin halyqaralyq deńgeıde tanýǵa shaqyrý arqyly antısemıtızmdi órshitti dep aıyptaǵan.

Frantsııa qyrkúıekte Palestına memleketin resmı túrde moıyndaýdy josparlap otyr.

- Biz Palestına memleketin qurýǵa, onyń ómirsheńdigin qamtamasyz etýge jáne onyń demılıtarızatsııasyn qabyldaý jáne Izraıldi tolyq moıyndaý arqyly búkil Taıaý Shyǵystyń qaýipsizdigine úles qosatynyna kepildik berýimiz kerek. Buǵan balama joq, - dep málimdedi Makron.

Buǵan deıin Italııa premer-mınıstriniń orynbasary Matteo Salvınıdiń prezıdent Emmanıýel Makronǵa qarsy aıtqan «qolaısyz málimdemelerinen keıin» Frantsııa Italııa elshisi Emanýel D’Alessandrony shaqyrǵanyn jazǵan bolatynbyz.