AQSh elshisi Qazaqstannyń Beıbitshilik keńesindegi rólin atady
ASTANA. KAZINFORM – AQSh-tyń Qazaqstandaǵy elshisi Djýlı Stafft Astanadaǵy AQSh Elshiliginde ótken resmı baspasóz máslıhatynda Qazaqstannyń Gaza sektoryn qalpyna keltirý máselelerimen aınalysatyn Beıbitshilik keńesindegi mańyzdy rólin atap ótti.
Dıplomattyń aıtýynsha, Beıbitshilik keńesi – Gaza sektoryn qalpyna keltirý men qaıta jańǵyrtýǵa baǵyttalǵan jańa ári ınnovatsııalyq bastama.
Ol Qazaqstannyń quryltaıshy memleketterdiń qatarynda bolýyna qatysty pikir bildirdi.
– Bul – tamasha ári zańdy qubylys. Sebebi Qazaqstan árdaıym kópjaqty dıplomatııanyń aldyńǵy qatarynda keledi, – dedi Djýlı Stafft.
Elshi AQSh Prezıdenti Donald Tramp Qasym-Jomart Toqaevtyń qalpyna keltirý jumystary qalaı júzege asýy tıis degen ustanymyna erekshe mán beretinin atap ótti.
– Prezıdent Tramp shynymen de Prezıdent Toqaevtyń qalpyna keltirý úderisin ilgeriletý jáne onyń aldaǵy jyldary qalaı júzege asatyny jónindegi kózqarasyn qurmetteıdi, – dedi ol.
Djýlı Stafft kóshbasshylar bul máseleni keńinen talqylaǵanyn jáne aldaǵy ýaqytta da pikir almasýdy jalǵastyratynyn jetkizdi.
Qorytyndylaı kele, elshi Qazaqstan men Prezıdent Qasym-Jomart Toqaevtyń Beıbitshilik keńesindegi róli óte mańyzdy ekenin atap ótti.
Eske salaıyq, 2026 jylǵy 22 qańtarda AQSh Prezıdenti Donald Tramp Davosta ótken Dúnıejúzilik ekonomıkalyq forým aıasynda Beıbitshilik keńesiniń qurylǵanyn resmı túrde jarııalap, ózge elderdi bastamaǵa qosylýǵa shaqyrǵan bolatyn. Keńes jarǵysyna 19 eldiń kóshbasshylary, sonyń ishinde Qasym-Jomart Toqaev qol qoıǵan.
Buǵan deıin Memleket basshysy Qasym-Jomart Toqaev AQSh elshisi Djýlı Stafftti qabyldaǵany habarlanǵan edi.