AQSh Elshisi alpaýyt ınvestorlardyń ónim bólisý kelisimin jarııa etý usynysyna pikir bildirdi

ASTANA. KAZINFORM – AQSh-tyń Qazaqstandaǵy Tótenshe jáne Ókiletti Elshisi Denıel Rozenblıým taý-ken salasyna ınvestıtsııany nyǵaıtý máselesine arnalǵan forýmda alpaýyt ınvestorlardyń ónim bólisý kelisimin jarııa etý usynysyna pikir bildirdi.

«Qazaqstan halqynyń bir bóligi toqsanynshy jyldary iri ınvestorlar men Qazaqstan Úkimetiniń arasynda jasalǵan ónim bólisý kelisimderin jalpyǵa jarııa etýdi talap etip júr. Ondaı kelisimder AQSh ınvestorlarymen de bekitilgen. Siz dıplomat retinde bastamashyl toptardyń osy usynysyna qandaı pikir bildiresiz? Kelisimderdi jarııa etý talaby oryndy dep oılaısyz ba?» - dep surady jýrnalıst forýmnan keıin.

Elshiniń oıynsha, atalǵan kelisimder eki tarapqa da tıimdi etip jasalǵan.

«Bul naqty munaıǵa baılanysty. Atalǵan kelisimder Qazaqstan Úkimeti men jeke kompanııalar arasynda bekitilgen. Olardyń keıbiri AQSh-tyń kompanııalary, keıbiri halyqaralyq kompanııalar bolǵan. Meniń qolymda ol kelisimder joq jáne maǵan olardyń monıtorıngine jaýapkershilik júktelmegen. Biraq onyń sebebi bar, kommertsııalyq kelisimder belgili bir úlgimen qurylymdalýy kerek. Sol arqyly ınvestorlardyń quqyqtaryn qorǵaý kózdelgen. Biraq ol sebep ınvestıtsııa tartýshy eldiń múddesine de saı. Naqty bul jaǵdaıda Qazaqstan múddesine saı. Toqsanynshy jylǵy kelisimderdiń qazirgi kelisimderden aıyrmashylyǵy bar dep oılaýyma esh sebep joq. Men ol kelisimder kommertsııalyq turǵydan tıimdi tásilmen bekitildi dep oılaımyn. Ol qujattar jalpyǵa jarııa bolý kerek pe, joq pa degen másele týraly pikirim joq. Biz bul kelisimder ınvestıtsııa salýshy kompanııalardyń, sondaı-aq úkimettiń de múddesine saı jumys istep keldi dep esepteımiz», - dedi dıplomat.