AQSh elshiligi Túrkııanyń ońtústik-shyǵysynda qyzmetkerlerdiń saparyna shekteý qoıdy

ASTANA. KAZINFORM – AQSh-tyń Túrkııadaǵy elshiligi Taıaý Shyǵystaǵy jaǵdaıdyń ýshyǵýyna baılanysty eldiń birqatar óńirine qyzmetkerleriniń saparyna ýaqytsha shekteý engizdi, dep habarlaıdy Kazinform agenttiginiń Ankaradaǵy menshikti tilshisi.

Dıplomatııalyq mıssııa málimetinshe, shekteýler AQSh-tyń Adanadaǵy Bas konsýldyǵy okrýgine kiretin 22 provıntsııaǵa qatysty. Sheshim óńirdegi qaýipsizdik táýekelderi men áskerı belsendilikke baılanysty qabyldanǵan.

Shekteý engizilgen provıntsııalar qatarynda Adana, Adyıaman, Batman, Bıngól, Bıtlıs, Dııarbakyr, Elıazyg, Gazıantep, Hakkıarı, Hataı, Mersın, Kılıs, Kahramanmarash, Malatıa, Mardın, Mýsh, Osmanıe, Sıırt, Shanlyýrfa, Shırnak, Týndjelı jáne Van bar.

Elshilik málimdemesine sáıkes, qyzmetkerlerge atalǵan óńirlerge arnaıy nusqaýǵa deıin barmaý tapsyrylǵan.

Sonymen qatar Túrkııada júrgen AQSh azamattaryna qaýipsizdik sharalaryn kúsheıtip, resmı aqparat kózderin qadaǵalaý usynylǵan.

Buǵan deıin Irakta AQSh-tyń Vıktorııa áýe bazasyna drondar shabýyl jasaǵany habarlanǵan bolatyn.