AQSh elshiligi óz azamattaryn Izraılden evakýatsııalaı almaı otyr
ASTANA. KAZINFORM – AQSh-tyń Izraıldegi elshiligi ázirge amerıkalyq azamattardy evakýatsııalaýǵa múmkindigi joq ekenin málimdedi, dep habarlaıdy Kazinform.
Málimdemege sáıkes, AQSh-tyń Ierýsalımdegi elshiligi seısenbi, 17 maýsymda jabylady.
— Qazirgi qaýipsizdik jaǵdaıy jáne Izraıl men Iran arasyndaǵy jalǵasyp jatqan qaqtyǵysqa baılanysty AQSh elshiligi AQSh-tyń barlyq memlekettik qyzmetkerleri men olardyń otbasylaryna kelesi eskertýge deıin úılerinde nemese jaqyn mańynda bolýdy buıyrdy, — delingen elshiliktiń H áleýmettik jelide taratqan habarlamasynda.
AQSh elshiligi sondaı-aq qazirgi ýaqytta amerıkalyq azamattardy evakýatsııalaýǵa nemese Izraılden ketýge tikeleı kómektesýge múmkindigi joq ekenin habarlaıdy.
Buǵan deıin AQSh Taıaý Shyǵysqa «USS Nimitz» áýe kemesin jiberetinin jazǵan bolatynbyz.
Al Irannyń memlekettik aqparat quraldary Izraılge zymyrandyq shabýyldardyń jańa tolqyny bastalǵanyn málimdedi.