AQSh elshiligi qazaqstandyqtar úshin mańyzdy habarlama jarııalady
ASTANA. KAZINFORM — AQSh-tyń Qazaqstandaǵy elshiligi vızalyq áńgimelesýge jazylý týraly habarlama jarııalady.
2 mamyrdan bastap, Astana jáne Almaty qalalaryndaǵy konsýldyq bólimder vıza suhbatyna jazylý rásimin suhbat kúnine úsh jumys kúni qalǵanda saǵat 17:00–de jabady.
Máselen, eger suhbat 2 mamyrǵa belgilense, DS-160 ótinishindegi barlyq málimet 28 sáýir saǵat 17:00–ge deıin tolyq toltyrylyp, jiberilýi tıis.
DS-160 ótinishi boıynsha rastama hatyńyzdaǵy shtrıh-kod nómiri (AA00 dep bastalady) men suhbatqa jazylý júıesine engizilgen DS-160 shtrıh-kod nómiri birdeı bolýy kerek.
— Suhbatqa jazylý júıesindegi shtrıh-kod nómirinde qate joqtyǵyna kóz jetkizińiz. Jıi kezdesetin qatelerdiń biri — «0» sanynyń ornyna «O» árpin paıdalaný. Durys shtrıh-kodtar árqashan AA00-den bastalady jáne mundaǵy 0 san retinde jazylady, — delingen habarlamada.
DS-160 ótinishińizde kórsetken suhbat orny (qala) men suhbattan ótý úshin tańdaǵan oryn (qala) birdeı bolýy kerek.
— Eger sizdiń DS-160 formańyzda «Ótinishińizdi tapsyratyn oryn» dep Almaty kórsetilse, biraq siz suhbatqa Astanaǵa jazylǵan bolsańyz, siz jańa DS-160 ótinishin toltyryp, suhbatqa úsh jumys kúni qalǵanǵa deıin shtrıh-kod nómirin júıede jańartýyńyz qajet, — delingen elshilik habarlamasynda.
Eger siz jazylyp qoıǵan suhbatyńyzǵa kelmeı qalǵan bolsańyz, sizdi «kelmegen (no show)» dep belgileıdi jáne siz DS-160 ótinishin jańadan toltyrýyńyz kerek.
Qaıtadan toltyrylǵan DS-160 ótinishiniń shtrıh-kod nómirin suhbat kúnine kem degende úsh jumys kún buryn jazylý júıesinde jańartýyńyz qajet.
Sizdiń DS-160 ótinishińiz toltyrylyp, jiberilgen bolýy tıis.
Ótinish berýshilerdiń kóbi DS-160 ótinishin suhbatqa bir kún qalǵanǵa deıin tolyq aıaqtamaı, sozyp júredi. Eger siz áli DS-160 ótinishin toltyrýdy aıaqtamasańyz, onda suhbatqa keminde úsh jumys kúni qalǵanǵa deıin tez arada toltyryp shyǵýyńyz kerek.
Eger sizdiń DS-160 ótinishińiz osy talaptarǵa saı kelmese, siz tirkelip qoıǵan suhbat kúni men ýaqyty joıylady, sizdi suhbatqa «kelmedi» dep belgileıdi jáne suhbatqa qaıtadan jazylýyńyz kerek bolady.
Aıta ketelik Qazaqstannyń kóshpeli vızasyn alǵandar salyqty qalaı tóleıtini týraly jazǵan edik.